Шәхесләрне үзебезгә үстерергә кирәк…

КатегорияИл һәм дөнья татарлары, Өлкә татарлары
Автор Администрация сайта

24 июньдә Самараның опера һәм балет театрында өлкә мәктәпләрен уңышлы тәмам­лаучыларга алтын медальләр тапшыру тантанасы узды. Яшьләргә дәүләт бүләкләрен өлкә губернаторы Николай Меркушкин үзе тапшырды.
Самара өлкәсе мәктәпләрен алтын медальга тәмамлаган 1733 укучы арасында безнең милләттәшләребез да бар.Тантанага Камышлы районыннан: Байтуганнан – Муса Шәкүров, Иске Ярмәктән – Алик Маслахов һәм Камилә Тә­җетдинова, Камышлыдан – Ильяс Хәй­ретдинов, Яңа Усманнан – Лилия Маннапова, Похвистнево районы Гали авылыннан Камилә Баһаутдинова һәм Гөл­наз Гайнуллина килгәннәр иде. Самараның “Яктылык” татар мәктәбе укучысы Мәрьям Адиятуллина да губернатор кулыннан алтын медаль алды.
Николай Меркушкин үзенең чыгышында медаль алучы­ларның өлкәбезнең һәм илебезнең алтын фонды булуын ассызлыклады һәм аларның укытучыларына да рәхмәт сүзләрен әйтте. “Шәхесләрне үзебез үстермәсәк, Самара өлкәсе алга китә алмаячак. Талантлы яшьләребезне губернада калдырганда гына “илебезнең таянычы” дигән статусын кайтара алачакбыз, – диде регион башлыгы. – Уку өчен өйдә уңай шартлар тудырылмаса, ярдәмегез булмаса, балаларыгызга югары уңышларга ирешү кыенрак булыр иде”, – дип ул ата-аналарны да игътибарсыз калдырмады.
Әминә Шиһапова.

“Бердәмлек”

Фикер калдыру