Бергә булганда, без тагын да көчлерәк

закиров и миннехановРөстәм Миңнеханов (уңнан сулга) һәм Ринат Закиров пленар утырышта.

Казанда авыл эшмәкәрләре җыены булып узды. Аның эшендә катнашырга Россиянең 41 төбәгеннән 700дән артык кече бизнес, фермер һәм крестьян хуҗалыклары вәкилләре кил­гән иде. Самара өлкәсеннән дә кырыклап кеше булып, араларында авыл хуҗалыгы предприятиеләре җитәкчеләре дә, шәхси эшмәкәрләр дә, кырчылык һәм терлекчелек продуктларын эшкәртү һәм сату белән шөгыльләнүчеләр дә бар иде. Күбрәк Похвистнево районыннан килүчеләр күзгә ташланды. Атаклы Гали авылы җирлеге җитәкчесе Идрис Муллабаев үзе белән авылның алдынгы крестьян-фермер ху­җалыклары баш­лыкларын – Камил Исхаковны һәм Халит Йосыповны алып килгән. Ә менә Сәйфулла Маннанов сәүдә тармагында эшли икән.

Аның бөтен тормышы көрәш иде

Гаряев 3Якташыбыз, классик кө­рәш буенча ике мәртәбә СССР, өч мәртәбә РСФСР чемпионы, СССР хәрби көчләренең XII җәйге спартакиадасы, Иван Поддубный истәлегенә узды­рылган турнир, Болгария, ГДР, Финляндия, Швециядә уздырылган ярышлар җиңү­чесе Наил ГӘРӘЕВнең тууына – 22 мартта 85 яшь, вафатына – 4 апрельдә 1 ел тула.

Җитмеш чакрым җирдән килдек без…

IMG_9858“Ак калфак” оешмасы әгъзаларының бер төркеме Айсылу Әбдиевага кушылып җырлый.

Ай, әле бик еракта идек без,

Җитмеш чакрым җирдән

                             килдек без…

Бу көнне нәкъ менә шулай, җырда җырланганча, сагынып, ашкынып өлкәбезнең төрле авыл-шәһәрләрендә яшәүче хатын-кызларыбыз “Дуслык” һәм “Ак калфак” оешмалары тарафыннан оештырылган фәнни-гамәли конференциягә үз­ләре алдында торган зур бурычлар турында сөйләшү өчен килгәннәр иде. Мәртәбәле кунаклар арасында Самара өлкәсе мөселманнарының региональ Диния нәзарәте рәисе, мөфти Талип хәзрәт Яруллин да,“Дуслык” оешмасы пре­зиденты, Бөтедөнья татар конгрессы башкарма комитеты әгъзасы Фәхретдин Канюкаев та, өлкә администрациясендә җәмәгать фикерен өйрәнү департаментының милли һәм конфессиональ сәясәт ида­рәсе җитәкчесе, баш консультант Надежда Осиповада, Татарстанның ТНВ каналының “Халкым минем” тапшыруын төшерүче һәм алып баручы Ләйсәнә Садретдиновада бар. Бөтенроссия “Ак калфак” оешмасы рәисе Кадрия ханым Идрисованың килүен көткән булсак та, бу юлы ул, башка ашыгыч эшләре булу сәбәпле, видеокотлавын гына җибәргән.

Гүзәл, күңелебезне кайтарма инде

ГузельБүген татар эстрадасында җырчылар, кем әйтмешли, төрле тәмгә – кайсын телисең, шунысын тыңла. Самарага да Казан артистлары еш килеп, концертлар куеп торалар. Без инде тәмам иркәләнеп беттек: “Миңа бу башкаручы ошый, тегесе ошамый”, – дип, концертларга сайланып кына йөрибез. Бәлки шуңа да соңгы вакытларда бу концертлар ярым буш залда үтәдер.

Интернет челтәрендә Татарстан мәчетләрендә вәгазьләрне татарча уку турында фикер алышалар

Интернет челтәрендә Татарстан мәчетләрендә вәгазьләрне татарча уку турында фикер алышалар

Бу яңалык Казанда республика мөселманнары Диния нәзарәтендә кабул ителде һәм зур яңгыраш тапты

(Казань, 15 августа, «Татар-информ», Айсылу Хафизова, Гөлүзә Василова). 11 августта Татарстан Республикасы мөселманнары Диния нәзарәте пленумы җомга вәгазьләрен татар телендә генә үткәрү турында карар кабул итте. Республика мөфтие Камил Сәмигуллин сүзләренчә, Татарстанның барлык имамнары бу яңалык өчен бертавыштан ризалык белдергән.

Әмма Россия һәм Татарстан өммәтендә мондый бердәмлек күзәтелми. Россия мөселманнары Диния нәзарәтенең элеккеге матбугат сәркатибе Диләрә Әхмәтова белдергәнчә, бу карар практик мәгънәгә ия түгел һәм татар теле проблемасын хәл итми. Автор фикеренчә, бу шәһәр яшьләрен, урта яшьтәгеләрне, читтән килүчеләрне һәм дингә яңа килүчеләрне Татарстан өммәте тормышында актив катнашудан читләштерәчәк. Бу вазгыять әлеге категория кешеләрен башка конфессияләргә, секталарга, хәтта террорчылар оешмаларына мөрәҗәгать итүгә этәрәчәк, дип борчылуын белдерде Диләрә Әхмәтова. Мәкалә рус телендә язылган. Күпләр Исламны этнизацияләү – ул Россия таркалуга юл дигән фикерне хуплаган.

Бөтендөнья татар яшьләре форумы рәисе Тәбриз Яруллин бу фикер белән килешми. Татар яшьләре лидеры бу пост турында татар телендә үз фикерен белдерде һәм мәчетләрдә татар теле буенча бушлай курслар дингә яңа килүчеләрне генә түгел, ә башка милләт вәкилләрен дә җәлеп итәчәк, дип билгеләп үтте. “Рамил хәзрәт (Юнысов) татар телендә вәгазь укыды, һәм моның өчен ничә кеше террорчылыкка китте?” – дип сорый Яруллин. Аңа, киресенчә,  мөселман хөтбәсен рус телендә кабул итәргә авыр икәнен билгеләп үтә. Яшь җитәкче совет кешеләре бабайлары динен нәкъ менә туган татар телләре аша кабул итәләр дип саный. Уфадан Римма Колбарс та үз фикерен белдергән: “Үзгәртеп кору елларында беренче тапкыр мәчеткә кергәч, татар телендә сөйләшергә мөмкин булуы куандырды. Мин нәкъ менә мәчет татар телен саклаган дип уйладым”.

Алия Мостафина Риодагы Олимпиадада алтын медаль яулады

Алия Мостафина Риодагы Олимпиадада алтын медаль яуладыГимнастчы борысларда ярышып, Россия җыелмасына сигезенче алтын медаль китерде

Россиядән Төркиягә туристлар агымы һәм сәүдә мөнәсәбәтләре торгызылырга мөмкин

Татарстан Президенты Рөстәм Миңнеханов Санкт-Петербургта Россия белән Төркия мөнәсәбәтләрен җайлау мәсьәләләре буенча сөйләшүдә катнаша

(Казан, 9 август, «Татар-информ», Арсений Маврин, Миләүшә Низаметдинова). Санкт-Петербургның Константинов сараенда Россия Президенты Владимир Путин һәм Төркия Президенты Рәҗәп Тайип Эрдоган очрашуы бара.

Эшлекле иртәнге аш форматындагы очрашудга икътисад, энергетика, транспорт министрлары, Сирия низагын җайга салу буенча экспертлар, шулай ук төбәк башлыклары кушылды. Дәүләтләр арасындагы мөнәсәбәтләрне җайга салу мәсьәләсендә сөйләшүгә кушылганнар арасында Татарстан Республикасы Президенты Рөстәм Миңнеханов та бар.

Киңәйтелгән форматтагы шушы очрашу алдыннан Владимир Путин белән Рәҗәп Эрдоган тар даирәдә очрашып сөйләште. Анда ике дәүләтнең тышкы эшләр министрлары һәм президентлар ярдәмчеләре катнашты. Ул сөйләшү ике сәгатьтән артык вакыт барды, монысы күпме вакытка аласы әлегә билгеле түгел.

Фикер алышуга чыгарылган темалар арасында – туристлар агымын торгызу. Россиянең Төркия курортларының туристик хезмәтләреннән баш тартуы сәбәпле, әлеге ил быел гына да 800 млн АКШ доллары күләмендә акча югалткан. Бу мәсьәлә уңай хәл ителгән очракта, Төркиягә Россия туристларын куркынычсызлык ягыннан тәэмин итәргә тиеш була. Моннан тыш, яклар ике икътисади проект турында фикерләшә: Төркия хәрбиләре Россия бомбардировщигын бәреп төшергәннән соң мөнәсәбәтләр суынганчыга кадәр республика территориясендә Россия проекты буенча атом электр станциясе төзү планлаштырылган иде. Төркия проектны эшләтеп җибәрү яклы. Илләр “Төрек агымы” проекты – Кара диңгез төбеннән газүткәргеч төзү буенча эшләрнең яңадан башлануы белән дә кызыксына.

Путин Эрдоганның Россиягә сәфәрен үзара аңлашуны яңарту дип бәяләде

Путин Эрдоганның Россиягә сәфәрен  үзара аңлашуны яңарту дип бәяләде  9 август 2016,17:07

Фото:kremlin.ru

 Россия лидеры төрек коллегасына сәүдә-икътисад элемтәләрен торгызуда фикер алышырга тәкъдим итте
(Казан,9 август, «Татар-информ»). Төркия Президенты Рәҗәп Тайип Эрдоганның Россиягә сәфәре  ике ил халкы мәнфәгатьләрен күздә тотып сөйләшүләрне яңарту теләге, дип белдерде РФ Президенты Владимир Путин. Бу хакта “Интерфакс” яза.

“Сезнең бүгенге сәфәрегез, Төркиядә сәяси хәл бик катлаулы булуга карамастан, Төркия һәм Россия халкының үзара  мәнфәгатьләрен яңартуны күздә тотып эшләнгәнлеге аермачыкһәм без ике як та моны телибез”, – диде ул төрек коллегасы белән очрашуда.

Россия  Президенты   Эрдоганны икътисади элемтәләрне яңартырга һәм терроризм  белән көрәш мәсьәләләрендә фикер алышырга чакырды. “Бүген безнең тар һәм киң даирәдә, шул исәптән сәүдә-икътисад элемтәләрен торгызуда һәм терроризмга каршы көрәштә хезмәттәшлек өлкәсендә сөйләшү мөмкинлеге бар”, – диде ул.

Үз чиратында Эрдоган Мәскәү һәм Әнкараның  ике ил арасындагы хезмәттәшлекне киңәйтүдә зур адым ясауларына өметләнүен белдерде. Ул шулай ук Төркиянең Россия белән хезмәттәшлек Советының чираттагы киңәшмәсен югары дәрәҗәдә бик теләп кабул итәргә әзер булуларын да әйтте. Президент көн тәртибендә ике яклы мөнәсәбәтләрне билгеләү, аларны үстерү буенча шактый эшлисе мәсьәләләр күтәреләчәген  билгеләп үтте.

Путин сүзләренчә, алдагы елларда Мәскәү һәм Әнкара арасындагы бәйләнешләр “моңарчы күрелмәгән югары дәрәҗәгә” җиткән. “Әмма узган елның ноябрендә безнең хәрби үлгәннән соң, түбән тәгәрәде, начарланды”, – дип белдерде.

Искәртеп узабыз: ике яклы элемтәләр, шулай ук Мәскәү һәм Әнкара арасындагы хезмәттәшлек  2015 елның 24 ноябрендә Төркия Хәрби Һава көчләре Сириядә Россия  хәрби самолетын бәреп төшергәч начарланды.

Ике як мөнәсәбәтләренең җайлашуы әлеге инциденттан   җиде ай үткәч, Эрдоган   Россия Президентына очучы үлеме өчен гафу үтенеп һәм үзара мөнәсәбәтләрне җайлауга омтылыш белдереп юллаган хаттан соң  башлана. Аннан соң 29 июньдә Россия ягы инициативасы белән Путин һәм Эрдоганның сөйләшүе була.

Ринат Закиров татар авылларын үстерү өчен яшьләрне эшмәкәрлек итәргә чакырды

Ринат Закиров татар авылларын үстерү өчен яшьләрне эшмәкәрлек итәргә чакырдыБөтендөнья татар конгрессы Башкарма комитеты рәисе Татарстанда татар милләтен үстерү юнәлешендә башкарыла торган эшләр турында сөйләде
(Казан, 6 август, “Татар-информ”, Гөлнар Гарифуллина). Беренче форумнарга килгән яшьләр бүгенге форумга килгән яшьләрдән шактый нык аерыла. Бөтендөнья татар конгрессы вәкилләре әнә шундый фикердә. Бүген бу хакта БТК Башкарма комитеты рәисе Ринат Закиров форумның пленар утырышын тәмамлап ясаган чыгышында белдерде. “Барыбызның да фикере бер – татар яшьләре шактый төпле фикерле”, – дип, ул яшьләрнең күбесенең милли хәрәкәттә катнашкан ата-бабаларының дәвамчылары булуын билгеләп узды.

Ринат Закиров Бөтендөнья татар конгрессы Башкарма комитетының төрле төбәкләрдәге яшьләр тормышына игътибарлы булуын ассызыклады. “Яшьләр хәрәкәте куәтле булмый икән, Бөтендөнья татар конгрессының 25 еллык эшчәнлегенең мәгънәсе булмаячак”, – диде ул. Аның сүзләренчә, Россия төбәкләрендә 100 дән артык татар яшьләре оешмалары бар.

Ринат Закиров татар авылларын торгызу, саклау буенча махсус проект – Татар авыллары эшмәкәрләре җыены уздырылуы турында сөйләп узды. “Бөтен төбәктән татар эшмәкәрләре килә, алар авылларның икътисадын булдыручылар”, – диде ул һәм татар авылларында яшәүче яшьләрне авылны үстерү өчен эшмәкәрлек белән шөгыльләнергә өндәде.

Шулай ук һәр елны татар дин әһелләрен очраштыру җыеннары уздырылуын да әйтеп китте. “Бу бик мөһим. Халкыбыз иманга килмәсә, аның киләчәге икеле”, – диде ул һәм ил буенча соңгы елларда илдә 3 меңнән артык, шул исәптән Татарстанда 1 меңгә якын мәчет төзелүен хәбәр итте. Ринат Закиров мәчетләрдә, янәсе, татарлардан тыш анда башка милләт вәкилләре дә йөри дигән сылтау белән, вәгазьләрне рус телендә уку гадәткә кереп киткәнен дә әйтте. “Бу алай булырга тиеш түгел. Вәгазьләр татар телендә укылырга тиеш. Яшьләр бу мәсьәләдә аеруча сизгер булсын иде. Мәчетләр – милләтне саклый торган урыннарның берсе”, – диде.

Ринат Закиров Казанда татар хатын-кызлары форумын үткәрүне дә күркәм гадәткә әйләнеп киткәнен искәртте. “Гомер-гомергә татар хатын-кызлары милләтне саклау юлында булган”, – диде. Ул шулай ук читтән килгән ватандашларны уку йортларына кертү буенча эш алып барылуын да әйтте һәм яшьләрне Казанга укырга чакырды.

Тәбрис Яруллин: “Проектлар кәгазьдә генә калмасын, тормышка ашсын иде”

Тәбрис Яруллин: "Проектлар кәгазьдә генә калмасын, тормышка ашсын иде"<br />
Форумның резолюциясенә кертеләчәк тәкъдимнәр әйтелде

(Казан, 5 август, “Татар-информ”, Ләйсән Исхакова). Бүген VII Бөтендөнья татар яшьләре форумы кысаларында оештырылган Россия тарихындагы беренче күмәк проектлар сессиясендә 50гә якын проект эшләнде.

Бу хакта бүген форумның пленар утырышында Бөтендөнья татар яшьләре форумы рәисе Тәбрис Яруллин хәбәр итте.

“Без бүген 50 төркемгә бүленеп бик нәтиҗәле эшләдек. Бер генә теләк – проектлар кәгазьдә генә калмасын, тормышка ашсын иде. Алар белән киләчәктә без, проект продюсерлары, эшләячәкбез. Проектларны этаплап гамәлгә ашыру, һәр этапны теркәп бару ниятләнә”, – диде ул.

Тәбрис Яруллин искәртеп үткәнчә, кичә яшьләр татар дөньясының әйдәп баручы спикерлары катнашында “Тарих һәм туризм”, “Тәрбия һәм белем”, “Этномәдәни проектлар менеджменты”, “Tatweb 2.0” (Татар теле һәм интернет), “PR һәм журналистика” юнәлешләре буенча белем һәм тәҗрибә туплады. Пленар утырышта аларның һәркайсы буенча нәтиҗәләр ясалды, резолюциягә кертеләчәк тәкъдимнәр санап үтелде.

Аерым алганда, “Тарих һәм туризм” юнәлеше буенча үткәрелгән секцион утырышның йомгаклары турында аның модераторы Айрат Фәйзрахманов сөйләде. Аның сүзләренчә, анда 30лап спикер чыгыш ясаган.

“Кайбер тарихи шәхесләргә һәйкәл кую, башка милләтләрнең тарихи хәтерен, фикерен санга сукмау – татар яшьләрен иң борчыган проблемаларның берсе. Секциядә һәйкәлләр кую буенча аерым иҗтимагый механизм булдыру, тарихи символларны барлап, аларны туристик проектлар рәвешендә тәкъдим итү әһәмияте дә билгеләп үтелде. Тарихи шәхесләребезнең онытылуы, Татарстан тарихы сәгатьләренең киметелүе, интернетта татар тарихына караган чыганакларның азлыгы мәсьәләләре күтәрелде”, – дип сөйләде Айрат Фәйзрахманов. Ул резолюциягә топонимик атамалар проектлары турындагы мәгълүматны киң җәмәгатьчелеккә ирештерү, һәйкәлләрне, истәлек билгеләрен урнаштыру мәсьәләләрен иҗтимагый тыңлауларда хәл итү, татар халкы тарихи хәтерендә тискәре эз калдырган шәхесләрне һәйкәлләр урнаштыруга юл куймау, Татарстан дәүләтчелегенең 100 еллыгына багышланган чараларны уздыруга булышлык күрсәтү, шулай ук татар яшьләре өчен бизнес-клуб булдыру тәкъдимнәрен кертү заруриятен әйтте.

Әдилә Һадиева: “Милли кием дизайны – әлегә көндәшле өлкә түгел”

Әдилә Һадиева: “Милли кием дизайны - әлегә көндәшле өлкә түгел”Күпләргә “ТНВ” телеканалындагы “Яшьләр тукталышы”, “Син – минеке, мин – синеке” тапшырулары аша таныш Әдилә Һадиева бүген Мәскәүдә милли киемнәр тегә
(Казан, 8 август, “Татар-информ”, Ләйсән Исхакова). Соңгы вакытта милли дизайнерлар саны арта. Шулай да, әлегә бу өлкәдә көндәшлек юк. Киресенчә, алар бер-берсе белән аралашып, үзара ярдәмләшеп яши. Бу хакта “Татар-информ” агентлыгы хәбәрчеcенә кичә Казанның Кабан күле буенда оештырылган “Печән базары” ярминкәсендә күпләргә “ТНВ” телеканалындагы “Яшьләр тукталышы”, “Син – минеке, мин – синеке” тапшырулары аша таныш Әдилә Һадиева сөйләде. Хәзерге вакытта ул Мәскәүдә “Сколково” резиденты булган IT-компаниядә PR-бүлек җитәкчесе булып эшләүдән тыш, заманча милли кием тегү белән дә шөгыльләнә. Бүген яшь әни декрет ялында.

Тумышы белән Татарстанның Саба районы кызы Әдилә Казан дәүләт университетының журналистика факультетын тәмамлаган. Озак вакыт телевидениедә эшләгәннән соң, Мәскәүгә күчеп киткән. Милли үзаңы көчле булу сәбәпле, биредә ул башта читекләр сату буенча интернет-кибет ачып җибәргән. Читекләрне заказ буенча эшләтергә ниятләгән, әмма Татарстандагы эшмәкәрләр белән уртак фикергә килә алмаганлыктан, бу проект ябылган.

“Проект ябылса да, миндә татарча әйберләр эшләү теләге сүрелмәде. Бер ел элек татар милли орнаментлары нигезендә заманча киемнәр тегә башладым. Бу милли костюмнар түгел. Бүгенге XXI гасыр кызлары нәрсә кия, мин нәкъ менә шундый кием эшлим. Әмма ул киемнең төп нигезе – татар халык орнаментлары, бизәкләре, рәсемнәре”, – дип сөйләде Әдилә Һадиева. Эш барышында ул, күп кенә милли дизайнерлар кебек үк, Фуад Вәлиевнең татар халкы орнаментларын туплаган китабыннан алынган үрнәкләрне файдалана, аларның кайберләрен заманчалаштырып, бизәкләргә яңа сулыш өрә.

Әдилә татарларның Мәскәүдә дә, чит илдә дә күпләп яшәвен, аларның татарлыкка сусавын әйтте. Араларында милли киемне киләчәк буыннарга калдыру нияте белән сатып алучылар да бар хәтта. Шуңа күрә продукциябезгә ихтыяҗ шактый зур, диде Әдилә.

“Күпләр миңа син бизнес ачып җибәргәнсең икән диләр. Әмма әлегә бу бизнес түгел, ә хобби, күңел ихтыяҗы. Ләкин яшьләргә бик ошый, моны көтәләр, алар милли әйберләргә сусаган. Бу – иң мөһиме. Әлегә милли киемнәр интернет аша гына сатыла. Киләчәктә кибет, челтәр булдыру теләге бар-барын, әмма моның өчен башка мөмкинлекләр таләп ителә. Ул чакта арендага, кибетчеләргә түләргә кирәк булачак. Ә бу, билгеле, кием бәясенең артуына китерәчәк. Минем исә һәркем сатып алырдай милли кием эшлисем килә”, – дип сөйләде ул. Шулай да, Әдилә үз эшен башлап җибәрергә теләгән татар яшьләренә курыкмаска киңәш итте.

Кырым аерым федераль округ булудан туктады – Россиядә отставкалар һәм үзгәрешләр көне

Кырым аерым федераль округ булудан туктады - Россиядә отставкалар һәм үзгәрешләр көне

Бельяниновны Федераль таможня хезмәтеннән җибәрделәр, ә өч өлкә һәм Севастопольдә яңа җитәкчеләр билгеләнде. Пәнҗешәмбе көнне Россия Президенты Владимир Путин ышынычны югалту, үз теләкләре белән һәм башка эшкә күчү сәбәпле берничә төбәк башлыгын оставкага җибәрде. Ә Премьер Дмитрий Медведев Федераль таможня хезмәте башлыгы, күптән түгел контрабанда эше буенча шаһит булган Андрей Бельянинов урынына яңа җитәкчене билгеләде, дип яза “Интерфакс” агентлыгы.

28июль көнне имзаланган карарда әйтелгәнчә, Таможня хезмәте башлыгы Бельянинов үз теләге белән отставкага җибәрелде. Аның урынына Төньяк-Көнбатыш федераль округта РФ Президентының Тулы вәкаләтле вәкиле вазифасыннан азат ителгән Владимир Булавин билгеләнде.

Бүгеннән Кырым федераль округы бетерелде, Россия Президенты аны Көньяк федераль округ составына кертте. Кремльдә билгеләп үтүләренчә, бу “Дәүләт хакимияте федераль органнары эшчәнлегенең нәтиҗәлелеген арттыру максатларында” эшләнгән.

Моңа бәйле рәвештә, Кырым федераль округында Президентның Тулы вәкаләтле вәкиле вазифасы кирәксез булып калды һәм аны биләгән Олег Белавенцев Төньяк-Кавказ федераль округында шундый ук урынны биләде.

Әлеге үзгәреш нәтиҗәсендә эштән азат ителгән Төньяк-Кавказ федераль округында Тулы вәкаләтле вәкил Сергей Меликов Илкүләм гвардиянең Федераль гаскәрләр хезмәте директоры урынбасары – Илкүләм гвардия гаскәрләре баш командующие итеп билгеләнде.

Россиянең кайбер төбәкләренә дә үзгәреш җиле кагылды. Пәнҗешәмбе көнне Киров өлкәсе губернаторы Никита Белых “ышанычны югалту сәбәпле” эштән азат ителде. Искәртеп узабыз: ул бер ай элек коррупциядә шикләнелеп кулга алынган иде.

Әлеге отставкадан соң Киров өлкәсен вакытлыча Дәүләт теркәве, кадастр һәм картография федераль хезмәте белән идарә иткән Игорь Васильев җитәкләде.

2014 елда референдумнан соң Россия составына кергән Севастопольдә дә үзгәрешләр бар. Әлеге шәһәрнең губернаторы Сергей Меняйло Россия Президентының Себер федераль округындагы вәкиле вазифасына күчте (шул рәвешле, ул Николай Рогожкинны алмаштырды).

Меняйло урынына вазифаны вакытлыча башкаручы итеп Дмитрий Овсянников билгеләнде. Ул 2015 елның декабреннән РФ сәнәгать һәм сәүдә министры урынбасары булып эшләгән иде. Ул шәһәр белән губернатор сайлаган зат үз вазифасына керешкәнче җитәкчелек итәчәк.

Ярославль өлкәсендә дә яңа җитәкче. Губернатор Сергей Ястребов үз теләге белән эштән китте. Эчке эшләр министрының элккеге урынбасары Дмитрий Миронов аның урынына төбәк башлыгы вазифаларын вакытлыча башкаручы итеп билгеләнде.

Россия Президентының отставка турындагы тагын бер указы Калинград өлкәсенә кагыла – 2010 елдан бирле губернатор вазифасын биләгән Николай Цуканов Владимир Путинның Төньяк-Көнбатыш федераль округындагы Тулы вәкаләтле вәкиле булды. Аңа алмашка төбәк башлыгы вазифаларын вакытлыча башкаручы итеп Евгений Зиничев билгеләнде. Аңа икенче төбәктән күченергә кирәкми – ул бер елдан артык Куркынычсызлык федераль хезмәтенең Калининград өлкәсе буенча идарәсе белән җитәкчелек итте.

1 августтан пенсияләр арта

1 августтан пенсияләр арта

222 сум 81 тиен өстәлә. 1 августтан эшли торган пенсионерларның пенсияләре арта. Пенсия фонды аларны “Иминият пенсияләре турындагы”  Федераль закон таләп иткәнчә, яңадан исәпли. Бу хакта “Российская газета” яза.

Дөрес, бик күп өстәмәгә өметләнергә кирәкми. Законда иң югары баллар (пенсия коэффициентлары) күрсәтелгән. Алар өчтән артырга тиеш түгел. Быел бер пенсия коэффициентының 74 сум 27 тиен булуын исәпкә алсак, 222 сум 81 тиен килеп чыга. Бу максималь өстәмәгә хезмәт хаклары аена 20 мең сумнан арткан кешеләр исәп тота ала.

Пенсияләрне инфляция дәрәҗәсенә карап индексацияләүгә килгәндә, эшләүче пенсионерлар өчен ул “читтән торып”  үткәрелә һәм бары эштән киткәннән соң гына түләнә башлый.

Татар яшьләре форумы һәр ике ел саен 5-6 татар гаиләсе барлыкка килүгә сәбәп була

Татар яшьләре форумы һәр ике ел саен 5-6 татар гаиләсе барлыкка килүгә сәбәп булаФото:Салават Камалетдинов

 Быел форумда катнашачак делегатларның 85 проценты – парсызлар. Бөтендөнья татар яшьләре форумыннан соң, гадәттә, 5-6 татар гаиләсе барлыкка килә. Бүген “Татар-информ” мәгълүмат агентлыгы үткәргән матбугат конференциясендә Бөтендөнья татар яшьләре форумы рәисе Тәбрис Яруллин шул хакта сөйләде.

Искәртеп үтик: 4-7 августта Казанда уздырылачак VII Бөтендөнья татар яшьләре форумында 30 чит илдән, Россиянең 60 төбәгеннән һәм Татарстанның барлык районнарыннан, шәһәрләреннән 900ләп делегат катнашуы көтелә. Шуларның 15 проценты гына гаиләле, калган 85 проценты – ялгызлар, диде Тәбрис Яруллин.

Форум рәисе сүзләренчә, шул рәвешле, җыен дөньяның төрле кыйтгаларында яшәүче парсыз татар егетләрен, кызларын үзара таныштыру, кавыштыру мәйданчыгы булып та тора. Әйтик, 2 ел элек үткәрелгән форум Санкт-Петербург егете Әнвәр белән Кырым кызы Зәнифәне кавыштырган. Алар, гаилә корып, бүген Кырымда яши. Форумда тиң ярын тапкан татар яшьләре арасында соңрак Казанга күчеп килүчеләр һәм Бөтендөнья татар яшьләре форумы белән эшчәнлекләрен дәвам итүчеләр дә аз түгел, диде ул.

“Бу үзенә күрә бер матур гадәткә әверелде. Нәтиҗәләр сөенерлек. Кызларны, кияүләрне алып китеп торалар. Гөрләтеп туйлар уздыралар. Узган җәйдә генә Австралиядә яшәүче татар яшьләре Татарстанга килеп, берсе кияү, берсе кыз алып китте”, – дип билгеләп үтте Бөтендөнья татар конгрессы Башкарма комитеты рәисе урынбасары Данис Шакиров.

Авыл туризмы тарафдарлары үз маршрутларын интерактив карта ярдәмендә төзи алачак

Авыл туризмы тарафдарлары үз маршрутларын интерактив карта ярдәмендә төзи алачак

Фото:prnt.sc/byxcga

 Моның өчен Интернетта махсус карта булдырырга уйлыйлар. Авыл туризмын үстерү, авыл территорияләренең комплекслы туристик продуктын таныту өчен интерактив карта төзергә уйлыйлар. Кичә Казанда узган “Идел буе федераль округында авыл туризмы үсеше: торышы, проблемалары, перспективалары” I төбәкара гамәли конференциясендә “Верное решение” компаниясе җитәкчесе Сергей Маслехин әлеге картаны тәкъдим итте. Ул җитәкләгән оешма территорияләр үсеше белән шөгыльләнә.

“Туризм өлкәсендә шәһәрләрнең генә түгел, авылның, аерым утарларның танылуы да мөһим. Яшь буын мәгълүматны Интернет челтәрендә эзли. Менә шул үзенчәлекле кунак йортларын табу өчен берәр корал кирәк. Ул ачык фотосурәтләрдән, кызыклы видеодан, утар хуҗасының кыскача аңлаешлы сөйләменнән гыйбарәт булырга тиеш. Игътибарны теләсә нәрсә җәлеп итәргә мөмкин – кемдер, мәсәлән, агачтан уелган бизәкле эшләнмәләр ясый, берәр хуҗабикә үзенчәлекле әйбер белән сыйларга әзер һәм башкалар. Күпчелек Интернеттан, Яндекс карта, Гугл картадан эзләгәч, интерактив карта кирәктер дип уйладык”, – дип аңлатты Сергей Маслехин. Ул моны, әйтик, туристик компанияләргә мөрәҗәгать итмичә, велосипедта каядыр юл тотучыларга уңайлы булачагын әйтте.

Сергей Маслехин “Татар-информ” агентлыгы хәбәрчесенә билгеләп үткәнчә, карта булдыру өчен авылларның, төрле хуҗалыкларның йөзен күрсәтүче “утар паспорты”н формалаштыру кирәк. “Анда бераз текст һәм игътибарны җәлеп итә торган визуаль элементлар булырга тиеш. Аннан инде шул утарларны картага төшереп булачак. Әмма ул үтемле булырга тиеш. Мәсәлән, каядыр барасың икән, Гугл карта шундук хәбәр итәргә тиеш – хәзер борылып, 5 км барсагыз, анда шул-шул әйбер булачак дип. Бу – идеалда инде, моның өчен кешенең кайдалыгы күзәтелеп торырга тиеш. Әмма бу чынга ашырып булмаслык нәрсә түгел”, – дип сөйләде Сергей Маслехин.

Аның әйтүенчә, үзендә туристлар күрергә теләгән һәр кунак йорты, хуҗалыклар, авылларга паспорт тутыру тәкъдим ителәчәк. Паспортта объекттагы шартларга, мөмкинлекләргә галочкалар куелырга тиеш. Мәсәлән, “кунакларны шимбә-якшәмбе генә кабул итә алам”, я булмаса, “бәдрәф урамда” дип. Турист исә шунда үзен кызыксындырган әйбергә галочка куя ала. “Без фантазиябезне эшкә җиктек тә, баксаң, берничә мең пункт була ала икән. Маршрутлар формалаштыру да кирәк. Һәр турист та үзенә нәрсә кирәген белеп бетермәскә мөмкин. Әгәр аңа 1 мең пункт тәкъдим итсәк, аның башы әйләнәчәк. Шуңа күрә популяр маршрут тәкъдим итәргә кирәк. Мәсәлән, “бал” дигән пунктны сайласа, картада барлык объектлар күрсәтелергә тиеш булачак. Турист үзенә кирәкле критерийларны сайлап ала да, күрәсе килгән нокталарыннан маршрут төзеп, юлга кузгала алачак”, – дип аңлатты Сергей Маслехин. Ул бу эшнең бик күләмле булуын билгеләп узды. “Үзенә туристлар җыярга теләгән меңләгән авыл хуҗалыкларын колачлап була. Тик һәрберсе белән эшләргә, анкета тутыру, фото, видео, аудио урнаштыру таләпләрен аңлатырга кирәк. Кемдәдер, фотограф, видеооператор булмаса, авыл туризмы төбәк ассоциациясе үз белгечләрен тәкъдим итә ала”, – диде Сергей Маслехин. Ул хуҗаларның үзләре тәкъдим иткән хезмәтләр өчен тулысынча җаваплы булырга тиешлеген ассызыклады. Әйтик, атларым бар ди икән, анда терлекчесе дә, атлар белән ниндидер интерактив программалар, ашату өчен ризыгы да булырга тиеш.

Әлеге интерактив карта Татарстанның Авыл туризмы ассоциациясенә тәкъдим ителгән. Соңгылары, үз чиратында, аны хуплаган. Сергей Маслехин әйтүенчә, бу картага туроператорлар да кушылып, билгеле бер турлар җыелмасын төзи ала.

Илдар Халиков: “Безнең максат – талантлы яшьләргә үзләрен күрсәтү мөмкинлеге бирү”

Илдар Халиков: “Безнең максат – талантлы яшьләргә үзләрен күрсәтү мөмкинлеге бирү”

 Татарстан Хөкүмәте йортында балалар һәм яшьләрнең интеллектуаль-иҗади мөмкинлекләре концепциясен тормышка ашыру мәсьәләләре буенча киңәшмә үткәрелде. Татарстан Президенты вазифаларын башкаручы ТР Премьер-министры Илдар Халиков бүген Хөкүмәт йортында балалар һәм яшьләрнең интеллектуаль-иҗади мөмкинлекләре концепциясен тормышка ашыру, талантлар белән идарә итү мәсьәләләре буенча киңәшмә уздырды.

Киңәшмәдә ТР Премьер-министрының беренче урынбасары Алексей Песошин, ТР Премьер-министр урынбасары – Министрлар Кабинеты Аппараты җитәкчесе Шамил Гафаров, республика Хөкүмәте әгъзалары, югары уку йортлары җитәкчеләре катнашты.

“Республиканың “Перспектива” балалар һәм яшьләрнең интеллектуаль-иҗади мөмкинлекләрен үстерү һәм тормышка ашыру концепциясе Татарстан Президенты Указы белән 2012 елның октябрендә үк кабул ителгән иде, – дип искәртте Илдар Халиков үзенең кереш сүз белән чыгышында. – 2014 елның декабрендә Татарстан Хөкүмәте Карары белән “2015-2020 елларга ТРда талантлар белән стратегик идарә итү” программасы кабул ителде. Программа елына 100 млн сум күләмендә финанслана, ә аларны гамәлгә ашыру буенча вәкаләтле органнар “Казан ачык талантлар университеты 2.0” автоном коммерцияле булмаган оешмасын билгеләде”, – дип өстәде ул.

Республика Хөкүмәте башлыгы шулай ук билгеләп үткәнчә, узган ел декабрьдә Татарстан Президенты Рөстәм Миңнеханов “Талантларны ачу” форумында сәләтле яшьләрне иртәрәк ачыклап, аларны күз уңыннан җуймый алга таба үстерү буенча эшне камилләштерүнең мөһимлегенә игътибарны юнәлтте.

Программаны 2015 елда тормышка ашыру барышы һәм быелга куелган бурычлар турында төп докладчы белән ТР Премьер-министры урынбасары – мәгариф һәм фән минмистры Энгель Фәттахов чыгыш ясады.

“2015 елда программада каралган 26 чара гамәлдә булды, үтәлде, – диде министр. – Алар арасында – уен рәвешендәге һөнәри ориентация сезонлы кампанияләрне, балалар һәм яшьләрне иртә һөнәрле итү. Шушы чаралар кысаларында 100ләп семинар, түгәрәк өстәл, экспертлар сессияләре, белем бирү мәктәпләре уздырылды”, – дип өстәде Фәттахов.

Программа конкурсларына 85 оешма һәм компания җәлеп ителде. Җитештерү мәйданнарының беркадәрендә, шул исәптән “КАМАЗ”да һәм Казан вертолет заводында, яшьләр һәм аларның остазлары иҗат иткән проектлар урнаштырылды. Талантлар университеты белән берлектә тренинг-класслар, проект лабораторияләре эшли, яшьләр фәндә ярыша. Яшьләрне эшкә җәлеп итүдә 150 остаз – ата-аналар, предприятиеләр һәм белем бирү оешмалары вәкилләре турыдан-туры эшли. Республика буенча формаль булмаган белем бирү программасына 10 яшьтән 30га кадәр булган 10 мең кеше җәлеп ителгән.

Гасырлар буе тупланган уникаль әдәби байлыкны саклап калырга кирәк – Татарстан мөфтие

Татарстанда “Китапка кылый хисап” дигән яңа проект гамәлгә ашырыла.Республика мөфтие Камил хәзрәт Сәмигуллин башлангычы белән, Татарстанда Хәнәфи мәзһәбе елы кысаларында, “Китапка кылыйк хисап” дигән татар дин тәгълимәтләрен саклап калу буенча яңа проект гамәлгә ашырыла. Татар дин тәгълиматчыларының борынгы китапларын исәпкә алу һәм туплау реестрын булдыру уникаль басмаларның тарихи кыйммәтен саклап калуга булышачак. Цифрлаштырылган китапларның электрон күчермәләрен теләгән һәркем Интернет челтәрендә Darul-kutub.com электрон китапханәсе сайтында укый ала. Моннан тыш, “Хозур” нәшрият йорты кайбер китапларны бүгенге заман татар теленә тәрҗемә итеп, яңадан бастырырга ниятли.

“Проектның төп максаты – гасырлар буе тупланган уникаль әдәби байлыкны, әһәмиятле кулъязмалар һәм китапларны тузудан, янгыннардан, битарафлыктан саклап калу, – дип билгеләп үтә Камил хәзрәт Сәмигуллин. – Кәгазь мәңгелек материал түгел, мирас киләчәк буыннарга да калсын өчен чаралар күрү зарур. Әлегә кадәр билгесез булган һәм хуҗалары гына кулланган борынгы басмалар сканерланып, интернетта урнаштырылачак. Без сирәк китаплар тарихчылар һәм туган якны өйрәнүче белгечләр өчен генә түгел, укучылар һәм студентлар, укытучылар һәм мөгаллимнәр, журналистлар, язучылар, гомәмән, Ислам һәм аның Россиядә үсеше белән кызыксынган күп кешегә әһәмиятле булыр дип уйлыйбыз”.

Моннан тыш, проектның авторлары китапларның электрон күчермәләре ярдәмендә татар галимнәренең онытылган исемнәрен һәм әсәрләрен кире кайтырырга һәм татар дин тәгълиматы тарихын һәм мәдәниятен өйрәнүгә Россиянең башка төбәкләре галимнәрен дә җәлеп итәргә тели.

Төркия Президенты Эрдоган 9 августта Россиягә киләчәк

Төркия Президенты Эрдоган 9 августта Россиягә киләчәк

Әлеге датаны Төркия вице-премьеры атаган

(Казан, 26 июль, “Татар-информ”). Төркия вице-премьеры Мехмет Шимшек Президент Реджеп Тайип Эрдоганның 9 август көнне Санкт-Петербургка килергә җыенганын әйткән. Бу белдерүне ул РФ вице-премьеры Аркадий Дворкович белән очрашу вакытында ясаган, дип яза “Интерфакс”.

Мехмет Шимшек сүзләренчә, Төркия Россия белән мөнәсәбәтләрне узган елның ноябренә кадәр булганнан яхшырак итәргә тели.

“Без вәзгыятьне һәм 24 ноябрь көнне өзелгән мөнәсәбәтләрне мөмкин кадәр тизрәк җайлау өчен бирегә килдек. Россия безнең якын күрше генә түгел, стратегик партнер да. Безнең мөнәсәбәтләр билгесез вакытка өзелде. Әмма без аларны 24 ноябрьгә кадәр булганнан яхшыртырга телибез”, – дип билгеләп үткән Төркия вице-премьеры.

Ул хәбәр иткәнчә, Төркия Россиягә чартер рейсларны яңарту өчен куркынычсызлык тәэмин итү турында доклад тәкъдим иткән.

Мехмет Шимшек шулай ук Россия җитәкчеләренә хәрби түнтәрелешкә омтылыш вакытында ярдәм иткән өчен рәхмәт белдергән.

Үз чиратында Дворкович, Россия һәм Төркия башлыклары очрашуы августның беренче яртысында булырга мөмкин дип билгеләп үткән. Аның сүзләренчә, Россия Төркия белән элемтәләрне яңарту өчен мөмкинлекләрнең яхшы булуын күрә.

“Сәүдәне, инвестицион хезмәттәшлекне яхшырту, зур проектларны тормышка ашыру, шул исәптән туристлар агымын торгызу өчен дә мөмкинлекләребез яхшы. Моның өчен тиешле шартлар һәм куркынычсызлык гарантиясен булдырырга кирәк”, – дип өстәгән Дворкович.

Казан Россиядә иң арзан яңа фатирлы шәһәрләр рейтингына кергән

Казан Россиядә иң арзан яңа фатирлы шәһәрләр рейтингына кергән

Татарстан башкаласында яңа фатирларның иң очсызы 977 мең сумнан башлана

(Казан, 27 июль, «Татар-информ»). Казан Россиядә яңа төзелгән торакларда фатир бәяләре иң түбән булган эре шәһәрләр егермелегенә кергән. Аналитикларның күчемсез милек белешмәләре базасын тикшерү нәтиҗәләрен китереп, cian.ru шул хакта хәбәр итә.

Экспертлар билгеләп үткәнчә, икътисадтагы торыксызлык күчемсез милек бәяләре төшүгә китерде. Яңа проектлар базарга бик түбән бәяле фатирлар белән чыга.  cian.ru аналитиклары Россиянең беренчел базарда фатир бәяләре иң түбән булган 20 эре шәһәре рейтингын төзегән. Моның өчен алар файдаланышка 2016-2018 елларда тапшыруны күздә тоткан объектларны исәпкә алган. Ачыкланганча, аларның теләсә кайсында 2 млн сумнан да очсызрак бәядән торак алу мөмкинлеге бар.

Рейтингның беренче унлыгына Краснодар, Мәскәү өлкәсе, Сарытау, Ростов-на-Дону, Төмән, Омск, Новосибирск, Красноярск, Пермь һәм Самара торак комплекслары кергән. Казан анда 13 нче урында исәпләнә. Татарстан башкаласында яңа төзелә торган йортларда иң арзанлы фатир бәясе 977 мең сумнан башлана.

Россия мөселман эшмәкәрләре ислам банкингыннан файдалана алачак

Партнерлык банкингы үзәге белән Россия мөселман эшмәкәрләре ассоцициясе хезмәттәшлек турындагы меморандум имзалаган

(Казан, 27 июль, “Татар-информ”). Партнерлык банкингы үзәге белән Россия мөселман эшмәкәрләре ассоцициясе хезмәттәшлек турындагы меморандум имзалаган. Әлеге документ белән ислам финансларын, икътисад һәм банк эшчәнлеген үстерү өлкәсендә уртак эшнең өстенлекләре һәм юнәлешләре билгеләнгән.

Меморандум кысаларында кайбер белем бирү проектлары һәм фәнни-тикшеренү эшләрен тормышка ашыру, шулай ук мөселман бизнес-берләшмәләре вәкилләре арасында хезмәттәшлекне арттыру ниятләнә. Моннан тыш, яклар юридик затларга расчет-касса хезмәте күрсәтү буенча махсус тарифлар һәм Россия мөселман эшмәкәрләре ассоциациясе әгъзалары һәм партнерлары өчен ташламалы шартлар кертү турында да килешкән.

Әйтергә кирәк, Партнерлык банкингы үзәге Россия Банкы, Татарстан Республикаксы буенча Милли банк, Татфондбанк, Татарстан Республикасы мөселманнары Диния нәзарәте, Ислам үсеш банкы (Согуд Гәрабстаны) ярдәмендә төзелгән. Шунысы да мөһим, Ислам банкы үзәгенең барлык продуктлары да Татарстан мөселманнары Диния нәзарәтенең Голәмәләр шурасы белән килештерелгән.

Путин: “Россия допингка катнашы булганнарның барысын да җавапка тартачак”

Путин: “Россия допингка катнашы булганнарның барысын да җавапка тартачак”
Фото:tass.ru

 Президент билгеләп үткәнчә, Россия үзенең “чиста” спортчыларын дисквалификацияләү белән ризалаша алмый һәм закон нигезендә дөреслек даулаячак
 (Казан, 27 июль, “Татар-информ”). Россия допингка катнашы булганнарның барысын да, кайсы чинда булуына карамастан, җавапка тартачак һәм “чиста” спорт өчен көрәшәчәк. Бүген бу хакта РФ Президенты Владимир Путин Россия олимпия җыелма командасы белән булган очрашуда игълан итте, дип белдерә ТАСС.“Без допинг белән бәйле җәнҗалларга катнашы булганнарның барысын да, чиннарына һәм хезмәтләренә карап тормастан, җавапка тартып кына калырга җыенмыйбыз, иң мөһиме – спортка допингны катыштырмаслык нәтиҗәле система да формалаштырырга ниятлибез”, – дип басым ясап әйтте дәүләт башлыгы.

Президент билгеләп үткәнчә, Россия үзенең “чиста”, ягъни допингтан азат җиңел атлетларын дисквалификацияләү белән ризалаша алмый һәм закон нигезендә дөреслек даулаячак.

“Мин моны басым ясап әйтәсем килә: без үзебезнең допингтан “абсолют чиста” җиңел атлетларыбызны дәлилсез дисквалификацияләү белән килешә алмыйбыз, – диде Россия лидеры. Аның сүзләренчә, Россия ”ачыктан-ачык дискриминация” булганда, моның белән “килешмәячәк”. “Бу тулысы белән олимпизм принципларына туры килми. Шулай да, дөреслеккә фәкать закон тәртибендә ирешәчәкбез, катгый рәвештә Олимпия хартиясенә туры китереп эш итәчәкбез”, – дип нәтиҗә ясады Путин.

Президент шулай ук допинг-контрольга бердәм халыкара таләпләр эшләргә һәм ул процедураның ачыклыгын тәэмин итәргә өндәде.

Бөтен илләрнең дә допинг белән бәйле проблемалары була, дип билгеләп үтте ул. Шулай да, Путин фикеренчә, бу өлкәдә төрле илләрнең атлетларына карата таләпләр аерыла. “Допингка каршы сайлап алып түгел, ә, чыннан да, нәтиҗәле көрәшү өчен бердәм халыкара допинг-контроль таләпләре эшләү кирәк дип инанам. Һәм, билгеле, спортчылар үзләре һәм җанатарлар тикшерүләр нәтиҗәләрен, кемнең, кайда, кайчан, ни рәвешле тикшеренә алуы, нинди нәтиҗәләр чыгарылуы ачык форматта күрә алырга тиеш”, – диде Россия лидеры.

VII Бөтендөнья татар яшьләре форумы турында “Татар-информ”да белергә була

Матбугат конференциясенә журналистлар чакырыла

(Казан, 27 июль, “Татар-информ”). 28 июль көнне 11.00дә “Татар-информ” агентлыгында VII Бөтендөнья татар яшьләре форумына багышланган матбугат конференциясе була.

Чарада Бөтендөнья татар яшьләре форумы рәисе Тәбрис Яруллин, Бөтендөнья татар конгрессы башкарма комитеты рәисе урынбасары Данис Шакиров һәм Бөтендөнья татар яшьләре форумы рәисе урынбасары Айрат Фәйзраханов катнаша.

Матбугат конференциясенә журналистлар чакырыла. Аккредитацияне pr@tatar-infom.ru электрон адресы буенча узарга мөмкин.

Татаристика югары мәктәбе филология, тарих, археология һәм культурологияне берләштерергә тиеш

Татаристика югары мәктәбе филология, тарих, археология һәм культурологияне берләштерергә тиешФото:kpfu.ru

 ТР Дәүләт Киңәшчесе Минтимер Шәймиев бу хакта КФУның Филология һәм мәдәниятара коммуникацияләр институтында әйтте
 Бүген ТР Дәүләт Киңәшчесе Минтимер Шәймиев КФУның Симуляцион һәм имитацион белем бирү үзәгендә булды. Бу хакта вузның матбугат хезмәте хәбәр итә.

Үзәктә ТР Дәүләт Киңәшчесе Фундаменталь медицина һәм биология институты җитәкчеләре һәм профессорлар белән аралашты. М.Шәймиев сәламәтлекне саклауның бөтенләй яңа системасын формалаштыруның төп элементы буларак университет клиникасын үстерү кирәклегенә басым ясады. “Көнбатышта барлык алдынгы технологияләр кешеләргә университет клиникалары аша килә. Бүген мин безнең университетта да яхшы мөмкинлекләр күрәм.  Кыска гына вакыт эчендә бу актуаль фәнни уку юнәлеше дөнья дәрәҗәсендәге җиһазлар белән тулыланды. Алга таба да бу юнәлешне үстерү зарур”, – дип билгеләп үтте Минтимер Шәймиев. Аның сүзләренчә, бу уникаль инфраструктура һәм университетның әйдәп баручы галимнәре башкалар тәҗрибәсен генә өйрәнеп калмыйча, үз тәҗрибәсен дә тарата ала.

Лаборатор корпуста КФУ ректоры Илшат Гафуров хәзер университетның медицина кластерында эшләнүче проектлар турында сөйләде. Аның фикеренчә, классик университетның төп өстенлеге – институтларның күп юнәлешле булуында. “КФУда һәр өлкәдән диярлек белгечләр табарга була. Бу уртак нәтиҗәгә ирешү өчен көчләрне берләштерү мөмкинлеген бирә”, – диде Гафуров.

Филология һәм мәдәниятара коммуникацияләр институтында татар телен, милли мәдәният, тарих һәм гореф-гадәтләрне саклап калу турында сөйләштеләр. “Татар филологиясен меңләгән студентлар өйрәнә, ә күптән түгел төзелгән  Татаристика югары мәктәбе катнаш юнәлешләр: филология, тарих, археология һәм культорологияне берләштереп, әлеге эшне ныгытырга тиеш”, – дигән фикерен җиткерде М.Шәймиев.

Халыкара мөнәсәбәтләр, тарих һәм көнчыгышны өйрәнү институтында да шул теманы дәвам иттеләр. Анда тарихчылар Татарстан Дәүләт киңәшчесенә милли мирасны өйрәнгән вакытта филологлар һәм тарихчыларның хезмәттәшлек традицияләре турында бәян итте.

“Бу хакта күбрәк сөйләшергә кирәк. Сез нинди нәтиҗәләргә ирешүегезне белеп торырга тиеш”, – дип ассызыклады Минтимер Шәймиев КФУга сәфәре азагында.

КФУның матбугат хезмәтендә хәбәр итүләренчә, бүгенге очрашу нәтиҗәләре буенча татар телен саклап калу һәм үстерү аспектлары турында фикер алышуны түгәрәк өстәл артында дәвам итү карары кабул ителгән.

Татарстан мөфтие Камил хәзрәт Сәмигуллин үзе яздырган аудио Коръән тәкъдим итәчәк

Татарстан мөфтие Камил хәзрәт Сәмигуллин үзе яздырган аудио Коръән тәкъдим итәчәк

Мөфтинең Коръәнне яздыруы Россия Ислам тарихында булганы юк иде – Рөстәм Батров

4 нче август көнне “Татар-информ” мәгълүмат агентлыгында мөфти Камил хәзрәт Сәмигуллин үз тавышы белән яздырган аудио Коръән тәкъдим итәчәк. Бу хакта Татарстан мөселманнары Диния нәзарәте рәисенең беренче урынбасары – матбугат секретаре Рөстәм хәзрәт Батров хәбәр итте.

Рөстәм Батров әйтүенчә, Коръәнне тулысынча яздыру өчен бик күп вакыт киткән. “Камил хәзрәт Сәмигуллин Россия мөфтиләре арасында беренче Коръән хафиз. Һәм ул Коръәнне тулысынча бөтен кагыйдәләре белән яздырып укып чыкты. Эш барышын шәехлар, зур галимнәр тикшереп торды. Авазларны әйтү ягыннан хаталы урыннары булса, аны дөресләтеп бардылар. Аудио Коръән бөтен тәҗвит кагыйдәләре, мәкам буенча дөрес итеп эшләнелгән. Мөфтинең, дин белгеченең Коръәнне яздыруы Россия Ислам тарихында әле булганы юк иде. Моны тарихи вакыйга дип тә атарга мөмкин. Төрле мөфтиләрнең Коръәнгә кагылышлы китаплар язганнары бар иде. Коръәннең бер өлешен яздыручылар да булды. Ә мондый форматтагы тулы Коръән беренче мәртәбә тәкъдим ителә.”

Аудио Коръән ике дискка яздырылган. Дисклар бушлай да тартылыр, сатуга да чыгарылыр дип көтелә.

Олимпия чемпионнары өчен премияләрне Татарстан күтәргән, Россия – юк

Олимпия чемпионнары өчен премияләрне Татарстан күтәргән, Россия – юк

5-21 августта Рио-де-Жанейрода старт алачак XXXI җәйге Олимпия уеннарында җиңү яулаган Татарстан спортчыларына күпме акча түләнәчәге ачыкланды/ 5-21 августта Рио-де-Жанейрода старт алачак XXXI җәйге Олимпия уеннарында җиңү урын яулаган Татарстан спортчыларына күпме акча түләнәчәге ачыкланды. Әлеге сумма ТР Министрлар Кабинеты карары нигезендә билгеләнә.

Татарстан спортчылары һәм тренерларына дәүләт ярдәме күрсәтү турындагы документта әйтелгәнчә, Олимпиада һәм Паралимпиада җиңүчеләренә – 4 миллион, көмеш медаль ияләренә – 2,5 миллион, ә бронза медаль яулаучыларга 1,7 миллион сум акча түләнәчәк. Тренерларга шул сумманың 50 проценты күләмендәге премия биреләчәк.

Әйтергә кирәк, стимул күләме узган Олимпия уеннары белән чагыштырганда, шактый арткан. Чагыштыру өчен: 2012 елда Лондондагы Уеннардан соң Татарстан спортчыларына 3,3 млн., 2 млн. һәм 1,3 млн. сум түләнгән иде. Тренерларына шул сумманың 50 проценты күләмендә акча бирелде.

Быелгы җәйге Олимпиадада Татарстан данын 16 спортчы яклаячагы хакында хәбәр ителгән иде. Әмма исемлектән волейболчылар Евгения Старцева һәм Виктор Полетаев төшеп калды. Россия спортчыларына карата Халыкара Олимпия комитеты кабул иткән карарда алдагы елларда допинг белән бәйле шау-шуларга тарыган спортчыларны бу ярышларга кертмәскә дигән пункт буенча Уеннарда велоузышчы Илнур Закаринның катнашмау мөмкинлеге бар.

4+4=8: Татарстан чемпионнарына баю мөмкинлеге

Әгәр дә Олимпия уеннарында чемпион калсалар, Татарстан спортчылары 4 кенә түгел, бәлки 8 миллион сум күләмендә акча алачак. Тагын 4 миллионны Россия хөкүмәте түлиячәк. Бу хактагы карарны РФ Премьер-министры Дмитрий Медведев ел башында ук имзалаган иде. Көмеш һәм бронза медальләр суммасы да Татарстанныкы белән тәңгәл.

Шунысы кызык, ил җитәкчелеге быел спортчыларга артык юмарт булырга җыенмый булып чыга. Кайбер фактларга гына игътибар итик. 2012 елдагы Лондон Олимпиадасында да, 2014 елгы Сочидагы кышкы Олимпия уеннарында да җиңүчеләр алган акчалата бүләк нәкъ быелгы күләмдә булган. Тотрыклылык, күркәм күренеш, әлбәттә. Спорт нәтиҗәләре дә шундый ук булса бигрәк тә. Икътисадта индексация, инфляция дигән төшенчәләр дә барлыгын онытсаң, быел ил данын күтәрүче спортчыларны моннан дүрт ел элек шундый ук уңышка ирешүчеләр белән чагыштырганда, бик начар бәяләнәчәк булып чыга. Лондон Олимпиадасы вакытында доллар да 30 сум тирәсе тора иде.

Рөстәм Миңнеханов: “Рубин” Европада уйнасын дип телик!”

Рөстәм Миңнеханов: "Рубин" Европада уйнасын дип телик!"

Кичә Казанның “Рубин” футбол командасын тәкъдим итү фанфесты үтте

(Казан, 25 июль, «Татар-информ»). Кичә башкаланың Гаилә үзәге янәшәсендә Казанның “Рубин” футбол командасын презентацияләү фанфесты үтте. Бу уңайдан Татарстан Президенты Рөстәм Миңнеханов команда җанатарларына видеомөрәҗәгать белән чыгып, аларны яңа сезон башлану белән котлады. Бу хакта Казан мэриясенең матбугат хезмәте хәбәр итә.

Республика Президенты Татарстан командасының җанатарлар мәхәббәтенә һәм игътибарына мохтаҗ булуына басым ясады. “Рубин” Европада уйнасын дип телик, аның уңышларына сөенергә язсын”, – диде Президент.

Фанфестта шулай ук Казан мэры Илсур Метшин да катнашты. “Без “Рубин” тарихындагы алтын белән уелып язылачак вакыйгаларның, зур җиңүләрнең шаһитлары булдык. Җиңүләрнең тагын буласына ышанычым зур”, – дип мөрәҗәгать итте мэр һәм клубка ярдәме өчен Татарстан Президентына рәхмәтен җиткерде.

“Рубин” фанфестында җанатарлар игътибарына клубның яңа уенчылары, логотибы, уенчылар формасы да тәкъдим ителде.

Рөстәм Миңнеханов: “Юлларны вакытында дәваларга кирәк”

Рөстәм Миңнеханов: "Юлларны вакытында дәваларга кирәк"<br />
Татарстан Президенты район башлыкларына юлларның торышын күзәтергә кушты

(Казан, 23 июль, «Татар-информ», Арсений Маврин, Гөлшат Ганиева). Татарстан Президенты Рөстәм Миңнеханов ТР Транспорт һәм юл хуҗалыгы министрлыгына юллар төзелешенең сыйфатына аерым игътибар бирүне, ә район башлыкларына аларның торышын күзәтүне йөкләде.

Республика башлыгы бу хакта ТР Хөкүмәте йортында видеоконференция режимында узган киңәшмәдә әйтте. Анда Татарстан Премьер-министры Илдар Халиков та катнашты.

“Юл салу буенча объектның 81ендә эшләр бара. План 51 процентка үтәлгән”, – дип хәбәр итте ТР транспорт һәм юл хуҗалыгы министры Ленар Сафин.

Быел торак пунктларга 40 км юл салачаклар һәм 370 км төбәк юлларын ремонтлаячаклар.

30 августка Кама аркылы күпернең икенче чиратын төзү дә тәмамланачак. “Быел Россиядә 2 генә күпер – Татарстанда һәм Удмуртиядә генә төзелә”,  - искәртеп үтте министр. Шул ук вакытка Зәй районында юл үткәргече дә салына. Ике объект та бер үк вакытта файдалануга тапшырылачак.

Графикка сыешмаган бердәнбер объект – федераль трассаның 941 нче юлы. “Волгомост” подряд оешмасы эшкә керешмәде дип хәбәр итте юл транспорты министры. “Быелга планлаштырылган эшне “Каздорстрой” башкарачак дигән карарга килдек. Ә тегесе белән без килешүне өзү процедурасын башладык”, – диде министр.

Республика көненә Татарстандагы торак пунктлардагы асфальт юлларны ремонтлау да төгәлләнеп килә. Бу эшләр төп программа буенча да, Татарстан Президенты фәрманы белән кабул ителгән өстәмә программа нигезендә дә башкарыла.

Татарстан Президенты республикада кабул ителгән югары стандартлардан бер генә миллиметрга да читкә китмәскә кушты: “Без юлларны ремонтлау һәм төзү өчен зур акчалар бүлеп бирәбез. Алар  тиешле ресурсны үтәмәсә, бик кызганыч. Сез республика өчен эшлисез, һәм юлларны үзегезгә эшләгән кебек салырга бурычлы. Стандарт бик катгый булырга тиеш. Казанда гына түгел, барлык эре шәһәрләрдә, бөтен җирдә дә. Кеше федераль юл, төбәк, муниципаль дип аерып тормый. Юл яки бар, яки юк”,

Пландагы эшләрдән тыш, агымдагылары да бар, алар турында да онытырга ярамый дип билгеләп үтте Рөстәм Миңнеханов. “Әгәр юлларда ярыклар барлыкка килә икән – моңа шунда ук игътибар итәргә һәм проблеманы чишү өчен акча табарга кирәк. Ярыкны ямау җиңелрәк. Вакытында, зур чокырлар барлыкка килеп, юл сафтан чыкканчы  дәваларга кирәк”, – диде ул район башлыкларына.

КФУдагы бүгенге имтихан татар бүлегенә ихтыяҗның зур булуын күрсәтте

КФУдагы бүгенге имтихан татар бүлегенә ихтыяҗның зур булуын күрсәтте

Бүгенге сынауны татар теленнән бердәм республика имтиханын тапшырмаган абитуриентлар уза.

(Казан, 20 июль, “Татар-информ”, Ләйсән Исхакова). Бүген КФУның филология һәм мәдәниятара багланышлар институтының Г.Тукай исемендәге татар филологиясе һәм мәдәнияте бүлегенә гариза биргән 130лап абитуриент татар теленнән имтихан тапшырды. Имтихан иртәнге 9да башланып, көндезге 12гә дәвам итте. Аның нәтиҗәләре иртәгә билгеле булачак.

“Без бакалавриатка абитуриентларны филология (татар теле һәм әдәбияты, тәрҗемә белеме); педагогик белем бирү (татар теле һәм әдәбияты, инглиз теле), (татар теле һәм әдәбияты, башлангыч мәктәп укытучысы) юнәлешләре буенча кабул итәбез. Шушы 3 юнәлешкә барлыгы 70 бюджет урыны каралган. Бу илнең башка вузларындагы милли юнәлешләр белән чагыштырып караганда, бик яхшы сан. Милли тел, әдәбият бүлекләренә бер генә бюджет урыны да бирелмәгән уку йортлары бар”, – дип сөйләде бүлек мөдире, профессор Әлфия Юсупова.

Абитуриентларның рус теле, җәмгыять белеменнән БДИ баллары, шулай ук татар теленнән имтихан нәтиҗәләре исәпкә алына. Бүгенге сынауны әлеге фәннән бердәм республика имтиханын тапшырмаган абитуриентлар уза. Әйтик, филология юнәлеше буенча гариза тапшырган 172 кешенең 47сенең БДИ нәтиҗәләре инде бар, шуңа күрә алар бүгенге имтиханнан азат ителгән.

Бүлек мөдире кабул итү сынауларының БДИ белән традицион имтихан кушылмасыннан гыйбарәт булуын әйтте, ягъни анда тест өлеше дә, киңәйтелгән җавап бирүне таләп иткән биремнәр дә бар. Шул ук вакытта абитуриентлардан мәктәп программасы күләмендә генә белем таләп ителә.

Мөфти турында ялган таратып, Интернетта акча җыярга теләүчеләр барлыкка килгән

Мөфти турында ялган таратып, Интернетта акча җыярга теләүчеләр барлыкка килгән<br />

Камил хәзрәт Сәмигуллин гайбәтләрне кире кага һәм мөселманнарны ялгыш адымга бармаска чакыра

(Казан, 23 июль, “Татар-информ”, Гөлшат Ганиева). Татарстан Республикасы мөселманнары Диния нәзарәте рәисе, мөфти Камил хәзрәт Сәмигуллин Instagram аккаунтында үзе һәм әти-әнисе турында чыккан гайбәтләрне кире какты.

Диния нәзарәте рәисе үзенең урынбасары Рөстәм Хәйруллин алган хәбәргә сылтама китергән:

“Әссәләмәгаләйкүм, Рөстәм хәзрәт. Безнең мөфтинең әти-әнисенең йорты янган һәм пенсионерлар үз пенсияләреннән 1000әр сум акча җыя икән дип ишеттек. Ә без, яшьләр, бу хакта берни дә белмибез. Бу хәбәрне раслагыз яки инкарь итегез әле, зинһар өчен. Дөрес икән, акчаны кая күчерергә икәнен, ничек ярдәм итеп булганын әйтегез”.

Татарстан мөфтие Камил хәзрәт Сәмигуллин бу мәгълүматны кире кага һәм мөселманнарны ялгыш адымнарга бармаска чакыра:

“Кайвакыт Интернетта үзең һәм гаиләң турында әллә никадәр кызыклы “яңалыклар” белергә була…Кемдер дөнья челтәрендә, имеш, минем әти-әниләрнең өйләре янган һәм, имеш, республиканың мескен пенсионерлары Татарстан Мөфтие гаиләсенә ярдәм итәр өчен 1000 шәр сум акча җыялар (яки җыярга тиешләр) дигән гайбәт тарата. Мондый хәбәр яки махсус таратылган ялган яки минем ир һәм кыз туганнарымның ялгышуы. Нинди генә очрак булса да: “Рәхмәт!” – диясем килә. Нинди генә максаттан эшләнүгә карамастан, Аллаһ аларга яхшы сыйфатлар бирсен. Мөгаен, һәрчак күз уңында булган кешеләр тирәсендә аларның үзләреннән дә күбрәк белгән кешеләр йөрүенә ияләнергә кирәктер инде. Мөгаен, тормыш шулай яратылгандыр”, – дип мөрәҗәгать иткән ул.

Мөселман яшьләре форумы кысаларында Сабан туе узды

Мөселман яшьләре форумы кысаларында Сабан туе узды

Бүгенге форум татар телендә, милли рухта үткәрелә.

(Казан, 22 июль, “Татар-информ”, Ләйсән Исхакова). Бүген мөселман яшьләре форумының алтынчы көне. Ул тулысынча татар телендә, гомумән, милли рухта уза. Форум кысаларында милли бәйрәм – Сабан туеның оештырылуы моңа дәлил булып тора. Бу хакта “Татар-информ” хәбәрчесенә ТР Мөселманнары Диния нәзарәтенең матбугат хезмәте вәкиле Айзирәк Гәрәева сөйләде.

Искәртеп үтик: мөселман яшьләренең II форумы Болгарда үткәрелә. Анда Татарстан, Башкорстан, Чувашия, Удмуртия, Кырым республикаларыннан, Ростов, Төмән, Пенза, Мәскәү өлкәләреннән 120ләп делегат катнаша. 16 июльдә башланган форум иртәгә төгәлләнәчәк. Атна дәвамында мөселман яшьләре аралашучанлык һәм лидерлык сыйфатларын үстерүне күздә тоткан тренингларда, исламның актуаль мәсьәләләренә багышланган түгәрәк өстәлләрдә һәм фикер алышуларда катнашты, чит илләрнең һәм Татарстанның күренекле дин әһелләре, шул исәптән Татарстан мөфтие Камил хәзрәт Сәмигуллин, белән очрашты.

Бүгенге чаралар иртәнге сәгать 10да башланган. Иң элек “Мөхәммәдия” мәдрәсәсенең укыту-тәрбия бүлеге проректоры Зөлфәт хәзрәт Габдуллин татарча вәгазь сөйләгән. Ул яшьләргә гыйлем алу үзенчәлекләрен аңлаткан. Аннары егетләрне, кызларны Спас районы башлыгы Камил Нугаев һәм әлеге район имам-мөхтәсибе Фәрхәт хәзрәт Минсәгыйров сәламләп, аларга үзләренең нәсыйхәтләрен әйткән. Шуннан соң кунаклар һәм яшьләр Ак мәчеткә җомга намазына җыелган. Аны Татарстан мөфтие урынбасары Рөстәм хәзрәт Хәйруллин алып барган. Җомга вәгазендә ул бәрәкәтле чорда яшәвебезне билгеләп: “Бүген Татарстанда 1,5 меңләп мәчет эшли. Бөтен республикага нибары 13 мәчет калган заманнар да булган. Хәзер исә динебез үсештә, иманлылар саны көннән-көн арта бара. Бүген дә республикабызның иң матур мәчетләренең берсендә җыелдык”, – дигән. Ул яшьләргә ялган сүзләргә ышанып, ялгыш юлга кереп китүдән сакланырга, галимнәрнең хезмәтләренә таянып эш итәргә киңәш иткән.

Улюкаевның Төркия министры белән Казанда буласы очрашуы Мәскәүгә күчерелгән

Моңа кадәр хәбәр ителгәнчә, Нихат Зейбекчи Татарстанда Рөстәм Миңнеханов белән төрек капиталы кергән предприятиеләрдә булырга тиеш иде.

Иртәгә, 26 июльдә, РФ икътисади үсеш министры Алексей Улюкаев Мәскәүдә Төркия икътисад министры Нихат Зейбекчи белән очраша. Министрлар анда ике яклы сәүдә-икътисади хезмәттәшлек турында сүз алып барыр дип көтелә. РФ Икътисади үсеш министрлыгы матбугат хезмәте шул хакта хәбәр итә.

Моңа кадәр Алексей Улюкаев белән Нихат Зейбакчи очрашуны 26сы Казанда уздырачагы турында хәбәр булган иде.Татарстан башкаласына килгәч, Нихат Зейбекчи ТР Президенты Рөстәм Миңнеханов белән төрек капиталы кергән 2 предприятиедә булып, җитештерү мәйданнары ачар дип планлаштырылган иде.

Татарстанда хезмәт хаклары 8 процентка арткан

Республика халкы айга уртача 29,4 мең сум акча эшли

(Казан, 24 июль, “Татар-информ”). 2016 елның беренче яртысында Татарстанда уртача хезмәт хакы 8 процентка арткан. Бу хакта Татарстанстат хәбәр итә. Экспертлар санап чыгарганча, республика халкының табышы бер айга уртача 29,4 мең сум тәшкил итә.

Татарстанстат хәбәренә караганда, республика предприятиеләре һәм оешмаларында эшләүчеләргә 29 мең 397 сум хезмәт хакы исәпләнгән. Ә бу узган елгыдан 7,9 процентка күбрәк.

“Минем гаиләмнең шамаиле” бәйгесе җиңүчеләре арасында үзен татар санаган рус кызы да бар

“Минем гаиләмнең шамаиле” бәйгесе җиңүчеләре арасында үзен татар санаган рус кызы да бар

 Конкурста киләсе елга шамаилләр музее ачылачагын игълан иттеләр
 Бүген Казан Кремленең Ислам мәдәнияте музеенда “Минем гаиләмнең шамаиле” Бөтенроссия конкурсына йомгак ясалды. Икенче тапкыр үткәрелгән бәйгегә Казан, Азнакай, Мамадыш, Яр Чаллы калаларыннан, Россиянең Владимир, Екатеринбург, Ижевск, Мәскәү, Санкт-Петербург, Уфа шәһәрләреннән юлланган 200дән артык заявка теркәлгән.

Бәйгенең шорт-битенә кергән шамаилләрдән “Казан Кремле” музей-тыюлыгының 3 мәйданчыгында күргәзмәләр эшләнелгән. Ислам мәдәнияте музее исә “Гаилә мирасы буларак шамаил” конкурстан тыш номинациясендә шамаилләрне тәкъдим иткән.Оештыручыларның һәм жюри әгъзаларының берсе, Татарстан мөфтиенең беренче урынбасары Рөстәм хәзрәт Батров сүзләренчә, быелгы бәйгенең аермасы конкурска профессиональ эшләр күп юлланылган булуда.

“Конкурска җибәрелгән эшләр, минем фикеремчә, профессиональ яктан бик нык үскән. Катнашучыларның саны узган елгы кебек бер тирәдә, әмма былтыр балалар эшләре бик күп иде. Быел исә без ул номинацияне булдырмадык, шуңа да карамастан, “Минем гаиләмнең шамаиле”ндә шактый күп кеше катнашты”, – диде ул. Аның сүзләренчә, бу бәйге турында күп кенә профессиональ рәссамнар ишетеп белә башлаган. Приз фонды да былтыргыга караганда зуррак. Иҗатчыларга бераз булса да матди ярдәм күрсәтү максатыннан, урыннарны берничә кешегә бүлеп түгел, ә бер катнашучыга гына тапшырырга ниятләгәннәр.

Рөстәм Миңнеханов: “Татарстанда Санкт-Петербург көннәрен уздыру дуслыкны һәм хезмәттәшлекне ныгыта”

Рөстәм Миңнеханов: "Татарстанда Санкт-Петербург көннәрен уздыру дуслыкны һәм хезмәттәшлекне ныгыта"Фото:prav.tatarstan.ru

Санкт-Петербург һәм Татарстан Республикасы хезмәттәшлек юлларын барлый

(Казан, 19 июль, “Татар-информ”, Гөлнар Гарифуллина). Бүген Татарстанга эш сәфәре белән Санкт-Петербург губернаторы Георгий Полтавченко җитәкчелегендә зур делегация килде. Татарстанга сәфәрләренең төп максаты – Санкт-Петербург һәм Татарстанның бизнес-берләшмәләре арасында хезмәттәшлекне үстерү турында фикер алышу, эшлекле мөнәсәбәтләрне ныгыту. Бүген кич С.Сәйдәшев исемендәге Зур концертлар залында ТРда Санкт-Петербург көннәре ачылачак. Санкт-Петербург сәнгать осталары концерты булачак.

Казанның “Корстон” комплексында Татарстан һәм Санкт-Петербургның үзара хезмәттәшлеге буенча төбәкара форум узды. Аның нәтиҗәсе буларак, ике як предприятиеләре бер-берсенең продукциясен алмашу мөмкинлекләрен барларга тиеш булачак.

Форум ачылу тантанасында Татарстан Республикасы Президенты Рөстәм Миңнеханов катнашты. Ул зур делегацияне сәламләүгә шат булуын белдерде. Бүгенге форумның Татарстанда Санкт-Петербург көннәре кысаларында узуын искәртте. “Без хезмәттәшлекне җанландыру, ике як өчен дә кызык булган актуаль проектлар турында фикер алышу, предприятиеләребез арасында туры багланышлар урнаштыру мөмкинлеген югары бәялибез. Санкт-Петербург – безнең стратегик партнер”, – дип, Президент төбәкләр арасында товар әйләнешенең 17 млрд сум тәшкил итүен һәм аны берничә тапкыр арттырырга кирәклеген әйтте.

Рөстәм Миңнеханов Татарстанның Петербургка йөк һәм җиңел автомобильләре, комплектлау детальләре, химия һәм нефть химиясе сәнәгате продукциясен, туклану продуктлары, суыткычлар, дәвалау препаратлары юллавын билгеләп узды. Ә Петербургтан республикага шулай ук җиңел машиналар, лифтлар, тракторлар, җиңел сәнәгать һәм азык-төлек сәнәгате продукциясе, лак-буяу материаллары кайтарыла. “Иң мөһиме – безнең күп кенә әйдәп баручы предприятиеләребезнең Санкт-Петербург оешмалары белән эшлекле элемтәләре булуы”, – дип белдерде Президент.

Энгель Фәттахов: “Баланы 10 нчы сыйныфка кабул итмәскә бернинди законлы нигез юк”

Энгель Фәттахов: “Баланы 10 нчы сыйныфка кабул итмәскә бернинди законлы нигез юк” 19 июль 2016,16:36
Фото:mon.tatarstan.ru

Балаларны 9 нчы сыйныфтан соң 10 нчыга кабул итмәү буенча шикаятьләрне министр раслады

(Казан, 19 июль, “Татар-информ”, Лилия Локманова). Татарстанда балалары 9 нчы сыйныфны тәмамлаганнан соң 10 нчы сыйныфка кабул итмәү буенча әти-әниләрдән шикаятьләр килүне Татарстан Премьер-министры урынбасары — республика мәгариф һәм фән министры Энгель Фәттахов раслады. Бүген Министрлар Кабинетында узган брифингта ул бу гамәлне закон нигезендә башкарылмавын билгеләп үтте.

“Имтихан нәтиҗәләре нинди булуга да карамастан, 9 нчы сыйныфтан соң балаларны 10 нчы сыйныфка кабул итмәскә бернинди законлы нигез юк. Директорлар да, мәгариф идарәсе җитәкчеләре дә, республика районнарындагы башка затлар да баланы 10 нчы сыйныфка кабул итүгә каршы була алмый. Без балаларны белем бирү оешмаларында урыннар белән тәэмин итәргә тиеш”, – диде Э. Фәттахов.

Ул шулай ук быел Татарстанда 600ләп белем бирү учреждениесенең база мәктәбе булачагын хәбәр итте. “Мәктәптә кимендә 80 бала укыса, ул база мәктәп була. Алар белем бирү сыйфатын гарантияләргә тиеш”, – дигән фикердә министр.

Татарстан мәчетләрендә җомга вәгазьләрен бары татарча гына уку турында карар кабул ителергә мөмкин

 

Бу хакта мөселман яшьләренең II форумын ачу тантанасыннан соң, журналистларга Татарстан мөселманнары Диния нәзарәте рәисе, мөфти Камил хәзрәт Сәмигуллин белдерде, дип хәбәр итә “Татар информ”. “Әлеге тәкъдим белән кайбер хәзрәтләребез чыкты. Мин дә бу фикерне хуплыйм, чөнки телебез юкка чыга бара. Динебезгә турыдан-туры карамаган, әмма аны саклый торган өч нәрсә бар, ул да булса – гореф-гадәт, тел һәм милли кием, дип әйтеп калдырган Шиһабетдин Мәрҗани.

Шуңа күрә аларны сакларга кирәк”, – диде ул.
Мөфти билгеләп үткәнчә, бу карар татар телен аңламаган кешеләрне вәгазь тыңлау, белем алу мөмкинлегеннән мәхрүм итә дигән сүз түгел. Рус телендә вәгазьне башка көннәрдә оештырырга була. Хәтта җомга да, әйтик, ахшам намазы алдыннан. Ләкин вәгазьләребез, гыйбадәтләребез, мәчеттә аралашу да татарча булса, яхшы булыр иде, диде ул.
“Казанда берничә мәчеттә генә русча сөйлиләр. Татар теленә өйрәнү авыр түгел. Өстәвенә, мәчетләр каршында рус телле якшәмбе курслары эшләп килә. Хәтта безнең Галиев мәчетендә дә дәресләр атнасына 6 тапкыр русча һәм нибары 1 мәртәбә татар телендә үткәрелә”, – дип сөйләде Камил хәзрәт Сәмигуллин. Шул ук вакытта ул җомга вәгазьләренең генә фәкать татар телендә алып барылачагын ассызыклады.
Карар Татарстан мөселманнары Диния нәзарәтенең пленумында кабул ителергә мөмкин. Пленумның Корбан гаетенә кадәр уздырылачагы билгеле (Корбан гаете быел 12-14 сентябрьдә була).

Гүзәл Уразова яңа клибын ничек төшергән? (ВИДЕО)

Татарстанның атказанган артисты Гүзәл Уразованың “Килче, килче” җырына төшерелгән клибы дөнья күрде. Әлеге шаян клипны кайда төшергәннәр, төшерү процессында нинди кыенлыклар белән очрашырга туры килгән – бу хакта Гүзәл Уразова Intertat.ru хәбәрчесенә сөйләде.

– Владимир Федоров көенә, Анна Попова сүзләренә иҗат ителгән “Килче, килче” җырының клибы Казаннан ерак түгел урында – ямьле Идел елгасы буенда төшерелде. Су өстендәге сал селкенеп торгач, урын әз булгач, биергә кыенрак булды. Әмма аның кызыгы да шунда иде. Сал су буйлап агып китмәсен өчен гер ясап, кирпечкә бәйләдек. Ә ярга йөзеп килү өчен үзебез белән таяк алдык. Әмма су төбе тирән булу сәбәпле, таякны ишкәк урынына файдаланырга туры килде, – дип сөйләде Гүзәл Уразова.
Җырчы сүзләренчә, бию күренешләре төшерелгән салны кору өчен берничә транспорт җәлеп итәргә туры килгән. Җыр сезон дәвамында башкарылгач, бию алдан ук куелган булган. “Үз эшенең осталары белән эшләгәч, клипны 2 көн эчендә төшереп бетердек”, – ди Гүзәл.
“Килче, килче” җырының клибында җырчы Илдар Хәкимовны да күрергә мөмкин. Клип эчтәлеге буенча, балыкчы Илдар су буена балык тотарга төшә. Күп тә үтми, янына чибәр кыз – Гүзәл килеп утыра. Менә хикмәт: Илдарның кармагына суүсемнәр эләксә, Гүзәл берсеннән-берсе зур балыклар тота! Егет белән кыз кавышырмы – җавабын клипны карагач белерсез!

2016 елда бер миллион россияле бурычлары аркасында чит илгә чыга алмаган

2016 елда бер миллион россияле бурычлары аркасында чит илгә чыга алмаган

Быелның алты аенда приставлар 197,5 мең әҗәтленең милкенә арест салган

(Казан, 19 июль, «Татар-информ»). 2016 елда Россиянең бер миллион кешесенә, бурычлары аркасында, чит илгә чыгу тыелган. Бу хакта Суд приставлары федераль хезмәте башлыгы Артур Парфенчеков үзенең Twitter челтәрендәге битендә хәбәр иткән.

Аның сүзләренчә, агымдагы елның беренче алты аенда приставлар бурычлыларга карата 961,7 мең карар чыгарган. Бу узган елның шул чоры белән чагыштырагн вакытта 336 меңгә артыграк дигән сүз.

Агымдагы елның алты аенда приставлар 197,5 мең әҗәтленең милкенә арест салган. Ә 2015 елның гыйнвар-июнь аенда әлеге күрсәткеч 30 меңгә кимрәк булган.

Суд приставлары федераль хезмәте башлыгының бәясе “Е заем” микрофинанс компаниясенең әлеге хезмәт мәгълүматалыран таянып эшләнгән исәпләүләреннән аерыла. Алар мәгълүматына караганда, 2016 елның алты ае нәтиҗәләре буенча чит илгә чыгарылмаган әҗәтлеләрнең саны 2 млн кешегә якын тәшкил иткән. Шул ук вакытта аларның яртысыннан артыгы банклар һәм микрофинанс оешмалары заемчылары булган.

Алсу мәхәббәт турында: «Fashion дөньясында аның брендының копияләре бихисап»

Күпләрнең яраткан җырчысы, якташыбыз Алсу Сафина инстаграмда ире белән рапс басуында төшкән фотосын урнаштырган. Өченче баласын көтүче Алсу хисләргә бирелеп, мәхббәт турында фәлсәфә дә корып алган.

Аның татарчасы якынча болайрак яңгырый: “Мәхәббәтне акчага сатып алып та, аңа тәэсир итеп тә булмый, ул иң нәзберек һәм сирәк материя, fashion дөньясында аның брендының копияләре бихисап, әмма аны тудыручы һәрвакыт чынбарлык, әгәр сезгә килгән булса, йөрәгегездәге мәхәббәтне  бернәрсә белән дә бутамассыз.”

Данил Салихов: “Яшьләр белән эш авыр бара”

Язучы яшьләр белән эшләүне берлекнең бурычы дип саный. Татарстан Язучылар берлеге рәисе итеп сайланганчы, Данил Салихов үзенең бүгенге әдәбият турындагы фикерләре белән уртаклашты.

- Дөресен генә әйткәндә, Язучылар берлеге эшләмәде түгел, эшләде. Берлек рәисе Рафис Корбанны эшләмәде дип әйтеп булмый. 12 илдән килгән төрки халыклар катнашында шигърият бәйрәмнәре үтте. Нинди генә әдәбияткә кагылышлы дата булмасын – Тукай, Җәлил көннәре, язучыларның түгәрәк даталары – барысы да үткәрелде. Әмма күңел рәнҗеше бар – олуг классикларыбыз, Туфан Миңнуллиннар, Хәсән Туфаннар кебек шәхесләр юбилейларын Тукай клубында гына түгел, зур залларда, Камал, Тинчурин театрларында үткәрергә кирәк иде. Бу алар өчен түгел, киләчәк буын өчен кирәк. Укучыларыбыз шул шәхесләргә тиңләшсен өчен кирәк. Без боларны Тукай клубындагы 150 пенсионер апа-абыйларыбызга гына күрсәтеп, әдәбиятыбызны алга ыргыта алмыйбыз. Шуңа күрә ул аудиторияләрдә яшьләр утырырга һәм катнашырга тиеш.

Аннары яшьләр белән эш авыр бара. Без аларны үзебезгә җәлеп итә алмадык. Бүген республикада “Калеб” яшьләр оешмасы бар. Алар рәссамнарны, композиторларны, гомумән, киләчәктә олуг шәхес булырдай яшьләрне җыеп, кичәләр уздыралар. Алар безнең белән үзара эшләсәләр, тагын да матуррак булыр иде.

Бүгенге корылтай сагындыргандырмы, бик ошады. Безнең бер генә ялгышыбыз булган – зуррак бинага җыелырга кирәк иде. Теләгән һәркем дә залда урын таба алмады. Рәис урынбасары булырак, ялгышымны таныйм.

Чыгышларга язылалар. Язылалар икән, димәк ниндидер үсеш, кызыксыну бар. Язучыларда борчылу дигән әйбер бар. Бу әйбер сөендерә. Берәү дә чыгыш ясамаса, ул чагында әдәбиятка караш сүнгән, бу берәүгә дә кирәкми дияр идек. Бүген укучы китап укудан читкә китте. Әгәр монда да бәхәсләр булмаса, – милләт үлеп бара дигән сүз. Шуңа күрә дә залларның шыгрым тулып торуы шатландыра.

- Еш кына укучылардан “безнең 400 гә якын язучы, китап кибетенә керсәк, укырга әйбер аз”, дигән сүзләр ишетелә.

- 337 язучы. Мин моны аңлата алам. Ни өчен дисәң, язучыларның китаплары, иң күп дигәндә, 3 мең данәдә чыга. Үзгәртеп кору башлангач, һәр кибетнең үз хуҗасы барлыкка килде, хәтта районнарда да татар китапларын сатмый башладылар. Укучыга китапны китереп тапшыру авырлашты. Китаплар 2-3 мең экземпляры чыга, җитәкчелегебез аларның 80 процентын китапханәләргә җибәрә, китап кибетләренә 150 данә кала. 150 данә ул күпме? Шуңа күрә китап кибетләрендә китаплар юктыр дип уйлыйм, – диде Данил Салихов.

Татарстан Президенты Италия компаниясе белән хезмәттәшлек итү юнәлешләрен билгеләде

Татарстан Президенты Италия компаниясе белән хезмәттәшлек итү юнәлешләрен билгеләде Фото:prav.tatarstan.ru

 «Сайпем С.п.А.» компаниясенең төбәк директоры “Түбән Кама Нефтехим” гавами акционерлык җәмгыяте өчен корылмалар төзү буенча тәкъдимнәр белдерде
 (Казан, 12 июль, «Татар-информ»). Татарстан Президенты Рөстәм Миңнеханов белән Италиянең «Сайпем С.п.А.» компаниясенең Берләшкән Дәүләтләр бердәмлеге һәм Балтия илләре буенча төбәк директоры Джанлука Алиотта бүген Татарстан Республикасы Хөкүмәте йортында республикада тормышка ашырыла торган нефть, газ, химия комплексында эре проектлар буенча хезмәттәшлек итү буенча фикерләштеләр. Бу хакта ТР Президенты матбугат хезмәте хәбәр итә.

Сириядә һәлак булган Рәфәгать Хәбибуллинны Ульяновск өлкәсендә мөселманча җирләделәр

Сириядә һәлак булган Рәфәгать Хәбибуллинны Ульяновск өлкәсендә мөселманча җирләделәр

 Очучыга Россия Герое исеме бирелергә мөмкин
(Казан, 12 июль, «Татар-информ», Рәмис Латыйпов). Сириядә һәлак булган полковник Рәфәгать Хәбибуллин бүген туган ягында – Ульяновск өлкәсе Иске Кулаткы районы Вязовый Гай авылында мөселман кануннары буенча җирләнде. Очучы белән хушлашырга меңнән артык кеше килгән.

Искәртәбез: 8 июль көнне россияле хәрби очучы-инструкторлар Рәфәгать Хәбибуллин һәм Евгений Долгин Сириянең Хомс провинциясендә сирияле Ми-25 вертолетында очканда “Ислам дәүләте” (ДАИШ, Россиядә тыелган) террорчылык төркеме һөҗүменә дучар булалар. Вертолет бәреп төшерелә. Ми-25 экипажы – очучы инструкторлар Рәфәгать Хәбибуллин һәм Евгений Долгин һәлак була.

Санкт-Петербург татар яшьләре милли тематиканы чагылдырган өстәл уеннарын популярлаштыра

Санкт-Петербург татар яшьләре милли тематиканы чагылдырган өстәл уеннарын популярлаштыра

 Бу уеннарны төбәкләрдә эшли торган татар яшьләре оешмаларына тарату ниятләнә
(Казан, 12 июль, “Татар-информ”, Ләйсән Исхакова). Санкт-Петербург татар яшьләре милли тематиканы чагылдырган өстәл уены демоверсиясен әзерләгән. Уен “Акыллы көрәш” дип атала. Бу хакта “Татар-информ” вәкиленә Татар яшьләре көннәре делегаты, Санкт-Петербург татар яшьләре берләшмәсе рәисе – тумышы белән Үзбәкстанның Сәмәрканд шәһәре егете Наил Шабанов сөйләде.

“Акыллы көрәш” уены нигезендә – татарның үткәне һәм бүгенгесе, халкыбызның күренекле шәхесләренә багышланган сораулар. Алар ярдәмендә татар яшьләре, гаиләләре, гомумән буш вакытын файдалы уздырырга теләгән һәркем уен формасында татар тарихына, мәдәниятенә бәйле кызыклы фактлар белән таныша ала. Әйтик, уен карточкаларында Казанга ничәнче елда нигез салынуы, Идел буе Болгарында ничә хан идарә иткәнлеге хакында сораулар бар. Аларга җавап биреп, уенчылар баллар туплый. Уен тартмасындагы милли бизәкле график сурәтләрнең барысын да яшьләр үзләре ясаган.

Икенче өстәл уены “Әкият” дип атала. Ассоциацияләргә корылган бу уенны татар рәссамнары белән берлектә әзерләгәннәр. Соңгылары арасында танылганнары да, рәсем сәнгатендә беренче адым ясый торганнары да бар. Әлеге рәссамнарның 84 иҗади эше карточкаларга төшерелгән. Уен кагыйдәләре буенча, катнашучыларга берничә карточка өләшенә. Уенчы аларның үзендә нинди ассоциация тудыруын, шулай ук алып баручы карточкасының нинди булуын әйтеп бирергә тиеш. Сүз уңаеннан, өстәл уеннарының икесендә дә миллилек йөреш ясый торган кечкенә фигураларда да чагыла: аларны Казан гербындагы зилант рәвешендә эшләгәннәр.

Римма Ратникова: “Дәүләт Думасына кандидатлар арасында хатын-кызлар һәм яшьләр аз”

Римма Ратникова: "Дәүләт Думасына кандидатлар арасында хатын-кызлар һәм яшьләр аз"

 “Бердәм Россия”дән кандидатларның гомуми исемлегендә һәр дүртенче кандидат – хатын-кыз
(Казан, 11 июль, «Татар-информ», Максим Кирилов, Гөлшат Ганиева). ТР Дәүләт Советы Рәисе урынбасары, ТР Журналистлар берлеге рәисе Римма Ратникова РФ Дәүләт Думасына Татарстаннан күрсәтелгән депутатлыкка кандидатлар арасында яшьләр һәм хатын-кызлар аз булуга зарланды. Бу хакта ул “Партия лигасы” дискуссия клубының чираттагы утырышында белдерде.

Татарстан парламенты вице-спикеры журналистларның сораларына җавап биреп, Дәүләт Думасына депутатлыкка Татарстаннан күрсәтелгән кандидатлар арасында хатын-кызлар (Әлфия Когогина һәм Ольга Павлова гына) һәм яшьләр аз булуны әйтте.

“Бердәм Россия” Бөтенроссия сәяси партиясенең Татарстан төбәк бүлеге башкарма комитеты җитәкчесе Андрей Кондратьев праймериз тәмамлангач, алдан тавыш бирү нәтиҗәләреннән канәгатьсез кешеләр булмауга гаҗәпләнүен әйтте. Ул гына да түгел, элек партия әгъзасы булмаучылар да праймериздан соң партия эшенә актив кушылырга тели. “Бу “Бердәм Россия” башкарган процедураның тагын бер казанышы һәм уңай ягы. Без чыннан да таяна алырлык кешеләр алдык”, – дип белдерде Кондратьев.

Шул ук вакытта партиянең Үзәк сайлау комиссиясе җитәкчесе урынбасары – Төбәк һәм технологик эшләр идарәсе җитәкчесе Андрей Парфенов ил буенча гомум исемлектә һәр дүртенче кандидатның хатын-кыз булуын әйтте. Ә яшьләре 30 яшькәчә булганнар – 15 кеше.

Искәртәбез: бүген РФ Үзәк сайлау комиссиясенә VII чакырылыш Дәүләт Думасына депутатлыкка кандидатларның федераль исемлеге һәм “Бердәм Россия” партиясеннән бер мандатлы округлар буенча кандидатлар исемлеге тапшырылды.

Төбәк исемлеген Татарстан Президенты Рөстәм Миңнеханов җитәкләде, икенче урында – ТР авыл хуҗалыгы һәм азык-төлек министры Марат Әхмәтов. Исемлектә праймеризда иң күп тавыш җыйган 14 кандидат бар. Тагын алты кандидат бер мандатлы сайлау округлары буенча көрәшкә кушыла.

Татарстанда яшьләрнең конфессияара форумы узарга мөмкин

ТР мөфтие Татарстанның Дагыстан үрнәгенә иярмәкче булуын әйтте

(Казан, 12 июль, “Татар-информ”, Гөлнар Гарифуллина). Татарстанның күп кенә өлкәләрдәге проектлары тәҗрибәсен башка төбәкләр өйрәнсә дә, республика үзе дә читтәге кызыклы тәҗрибәләрне үзендә файдалана. Бу хакта бүген “Татар-информ” мәгълүмат агентлыгында узган матбугат конференциясендә ТР мөселманнары Диния нәзарәте рәисе, ТР мөфтие Камил хәзрәт Сәмигуллин белдерде.

Мөфти сүзләреннән аңлашылганча, Татарстанда яшьләрнең конфессияара форумы узуы ихтимал. “Без үзебез дә кайбер кызыклы тәҗрибәләрне кулланабыз. Мисал өчен, Дагыстанда кызыклы тәҗрибә бар. Владыка Феофан Кавказда булганда, яшьләрнең конфессияара форумы булган. Мөселман, православие вәкилләре бер-берсенең мәдәниятен өйрәнгән. Хәзер без атакай белән монда ничек итеп үткәрергә дип сүз алып барабыз”, – диде.

Камил хәзрәт, төбәкләрнең бер-берсенең тәҗрибә алмашуына килгәндә, изге эшләрдә ярышырга тиешлекне әйтте. “Кемнең беренче башлавы мөһимдер, әлбәттә. Әмма принципиаль түгел. Татарстан күп очракта беренче, бәлки бу безнең халыкның инициативалылыгы белән бәйледер. Без 10 мең кеше катнашында Ифтар мәҗлесе үткәргән иде. Бездән күреп, башка төбәкләр тагын да күбрәк кеше җыеп Ифтар ясады. Әмма без беренче булдык”, – диде мөфти.

Болгарда узачак “II Мөселман яшьләре форумы”нда Сабан туе да булачак

Форум кысаларында әхлакый тәрбия, экологик, спорт юнәлешләре дә колачланачак(Казан, 12 июль, “Татар-информ”, Гөлнар Гарифуллина). Быел Болгарда узачак “II Мөселман яшьләре форумы” нда Сабан туе үткәреләчәк. Бу хакта бүген “Татар-информ” мәгълүмат агентлыгында узган матбугат конференциясендә ТР мөселманнары Диния нәзарәтенең яшьләр эшләре буенча бүлек башлыгы Айгөл Биктимерова белдерде.

“Форумдагы яшьләр татар халкының милли көнкүреше, традицияләре белән якыннан таныша алачак. Әйтергә кирәк, чит төбәкләрдән килгән яшьләр татар халкы традицияләре белән бик тә кызыксына. Бу максаттан Сабан туе уздырачакбыз”, – диде Айгөл Биктимерова.

Спикер әйтүенчә, икенче форумны Болгарда чатыр лагере территориясендә уздыру яшьләрнең күңеленә бик хуш килгән. “Без моны оештыра алуыбызга бик шатбыз. Әлеге читкә чыгып оештырылган форум – саф һава сулау, изге җирдә рухи, дини азык алу өчен яхшы мөмкинлек. Анда ел дәвамында барлыкка килгән тыгыз элемтәләр көчәя”, – диде ул.

Айгөл Биктимерова башка төбәкләрдә дә мөселман яшьләре белән очрашулар мөһим булуын, аларның форумны ел буе көтеп алганын билгеләп узды. “Былтыр да бар кеше дә вакытында теркәлергә өлгермәгән. Кемнәрдер бу хакта соң ишеткән булып чыкты. Бу форум үзенә күрә тәҗрибә уртаклашу да, читтәгеләр безгә үзләре турында сөйли. Яше тулмаганнар инде киләсе форумны көтә, бу безне сөендерә”, – диде.

Айгөл Биктимерова яшьләрнең белемгә тартылуын билгеләп үтте. “Быел да күренекле дини тәгълиматчы Абдерәхим Лакримның киләчәгендә шик тумады. Яшьләр үзләре дә алдан ук форумга кемнәр килүе белән кызыксынды. Шуңа күрә форумның планын, программасын төзегәндә, моңа игътибарны юнәлттек. Көн саен лекция, әңгәмәләргә вакыт бүләчәкбез. Форумга кадәр кемнең ни белән кызыксынуы, кайсы өлкәдә белемен баетырга теләве турында сораштык. Яшьләргә кызыклы лекторларны чакырдык”, – диде ул.

Судан Татарстанның хәләл продукция җитештерүчеләре белән хезмәттәшлек итәргә тели

Казанда Судан Республикасы делегациясе белән ТР мөселманнары Диния нәзарәте вәкилләре очрашты

Бүген Татарстанга эшлекле визит белән Судан Республикасының РФдәге Гадәттән тыш һәм Тулы вәкаләтле Илчесе Надир Йосыф Әльтайеб Бабикер җитәкчелегендәге делегация килде, дип хәбәр итә ТР мөселманнары Диния нәзарәте матбугат хезмәте.

Кунакларны Татарстан мөфтие Камил хәзрәт Сәмигуллин, мөфтинең беренче урынбасары Рөстәм хәзрәт Батыр һәм ТР МДН аппараты җитәкчесе Рәфис Шаһвәлиев каршы алды.

Мөхтәрәм кунаклар белән очрашуда “Хәләл” стандарт комитеты, “Вакыф” Фонды җитәкчелеге, Икътисад министрлыгы, ТР Авыл хуҗалыгы һәм азык-төлек министрлыгы, Россия мөселман эшкуарлары ассоциациясе, мөселман табиблары берлеге, Партнерлык банкингы үзәге, Республика балалар клиник хастаханәсе һәм хәләл хезмәт күрсәтүче оешма вәкилләре катнашты.

Ике як үзара элемтәләрне һәм хезмәттәшлекне ныгыту максатыннан, очрашу барышында перспективалы юнәлешләрне барладылар.
Аерым алганда, Судан Республикасының РФдәге Гадәттән тыш һәм Тулы вәкаләтле Илчесе Надир Йосыф Әльтайеб Бабикер Татарстанда хәләл продукция җитештерү өлкәсе шактый алга киткән булуын билгеләде.

“Суданда күбесенчә мөселманнар яши һәм без сезнең белән барлык өлкәләрдә дә хезмәттәшлек итәргә әзер. Аеруча, хәләл-медицина өлкәсен үстерүдә нәтиҗәле эшли алабыз. Шулай ук вакыфлар системасы тәҗрибәсе белән дә бүлешә алабыз. Мәсәлән, безнең Мәккәдә һәм Мәдинәдә вакыфлы милкебез бар. Бу тәҗрибә белән без, һичшиксез, уртаклашачакбыз”, – дип белдерде илче.

Судан Республикасының РФ дәге Гадәттән тыш һәм Тулы вәкаләтле илчесенең киңәшчесе Ахмед Халифа Мохамедали Идрис һәм Судан Илчелегенең РФ дәге хәрби атташе урынбасары Мохамед Рахма “Хәләл” стандарты буенча продукция чыгаручы Татарстан җитештерүчеләре белән элемтәләрне җайга салырга вәгъдә иттеләр.
Искәртеп үтик, бүген Судан Республикасы ТР Президенты Рөстәм Миңнеханов белән очрашты. Якын арада Судан башкаласы Хартумга хезмәттәшлекнең перспективалы юнәлешләрен җентекләп өйрәнү өчен эшче төркем җибәреләчәк.

Бары – бергә, югы – уртак бездә…

“Килен – каенана туфрагыннан”, – дип әйтәләр бит. Халык әйтсә, хак әйтә шул. Камышлы авылында яшәүче каенанасы Тәнзилә белән килене Заринә Гатауллиналар бер-берсенә шулкадәр охшаганнар, хәтта аптырап:

- Сеңелем, син Тәнзилә апаның кызы буласыңмы әллә? – дип сорамыйча булдыра алмадым. Ул:

- Әйе, Раилгә кияүгә чыкканчы ук күпләр миннән: “Тәнзиләгә охшагансың, син аның кызы түгелме?” – дип сорыйлар иде. Тәкъдир каләме язган булгандыр инде, аның килене булып куйганымны сизми дә калдым, – дип көлеп җибәрде Заринә ханым.

Әниле-кызлы кебек берсен-берсе хөрмәт итеп яшәүләренә унбиш ел узып та киткән инде.

Танышу тарихына килгәндә, бик кызык булган бу. Тәнзилә апа азык-төлек сату кибетенә баргач, анда эшләүче чибәр, ачык йөзле татар кызын күреп, аның кайдан һәм кем булуы белән кызыксынган. Заринә Таҗикстаннан кайтып, биредә төпләнүләре, әти-әнисенең Дәүләткол авылыннан булуларын сөйләп бирә.

Тәнзилә Минзәки кызы өенә кайтып, бу турыда сөйли. Раил кибеттә яңа кыз эшләвен колагына элгән булса кирәк. Ул кибеткә бара һәм бу мөлаем кызга бер күрүдә гашыйк була. Егет тә Заринаның күңеленә хуш килә. Бераз очрашып, сөйләшеп йөргәннән соң алар өйләнешергә булалар.

Шул вакыттан бирле күп сулар аккан инде. Әтиләре Гази ага да вафат булган.

- Мине бу йортта бик җылы кабул иттеләр. Әткәй мәрхүмнең урыны оҗмах түрендә булсын. Ул, әнкәй кебек үк, миңа карата бик тә миһербанлы, сабыр, ярдәмчел булды, – дип каенатасын искә ала Заринә.

Яшь гаиләнең дәвамчылары да бар. Кызлары Айгөл – тугызынчы, Альбина алтынчы сыйныфта укыйлар.

Тәнзилә апаның яшьлек елларын барлап утырганда, мин аның каенанасы турында да сораштым. Ул:

- Каенанам, мәрхүм, бик таләпчән, ут чаткысыдай тере карчык булса да, бик тә ипле кеше иде. Мин шуны аңладым – беркайчан да улың һәм киленең белән идарә итәргә, өстенлек күрсәтергә ярамый. Чөнки алар инде җитлеккән кешеләр, үзләре гаилә төзеп, балалар үстерәләр, димәк, бөтен нәрсәне дә үзләре хәл итәргә тиеш, – дип каенана белән килен мөнәсәбәтләренең серен ачты. Ә килене:

- Яшь чакта күп нәрсәне аңлап бетермисең бит, шуның өчен өлкәннәр киңәшенә колак салырга, тыныч яшәргә тырышырга, бер-береңә юл куя белергә кирәк. Монда гаиләдә алган әти-әни тәрбиясе, әбиемнең акыллы сүзләре дә бик ярап куйды.

Бездә минеке – синеке юк, бары – бергә, югы – уртак.

“Алабуга” Европада иң яхшы махсус икътисади зона дип табылган

"Алабуга" Европада иң яхшы махсус икътисади зона дип табылган<br />
Бу хакта “Алабуга” МИЗның 10 еллыгына багышланган утырышта оешманың генераль директоры Тимур Шаһивәлиев сөйләде/(Алабуга, 5 июль, «Татар-информ», Арсений Маврин, Гөлшат Ганиева). “Алабуга” МИЗ зур проектлар өчен Европаның иң яхшы махсус икътисади зонасы дип табылган. Бу хакта МИЗның 10 еллыгына багышланган утырышта “Алабуга” МИЗ генераль директоры Тимур Шаһивәлиев сөйләде. Ул  алынган дипломның кечерәйтелгән күчермәсен истәлек өченРөстәм Миңнехановка  тапшырды.

Территорияне алга таба үстерү перспективалары турында сөйләгәндә, Тимур Шаһивәлиев хәзерге вакытта глобаль икътисади вәзгыятьнең яхшылардан булмавын билгеләп үтте. Россия икътисадына көнбатыш инвестицияләре күләме 92 процентка кимегән. Кытай инвестицияләренә өметләр дә әлегә акланмаган.

“Мондый шартларда потенциаль партнерларга тәкъдимнәр мөмкин кадәр отышлы булырга тиеш”, – дип саный Тимур Шаһивәлиев. Инвесторлар бизнес белән шөгыльләнү өчен шартлар: территория, инфраструктура, комплектлаучылар, сервис, чимал һәм энергия чыганаклары булган җиргә килергә тели.

“Татастан дәүләт компаниясен булдыруга 70 млн сум акча салды. Нәтиҗәсе – 16 млрд сум инвестицияләр”, – дип белдерде МИЗ генераль директоры. “Кытай шундый ук тәкъдимнәр кертә. РФ Икътисади үсеш һәм Пекин дәрәҗәсендә уртак проектны тормышка ашыру турында карар кабул ителде”, – дип хәбәр итте Тимур Шаһивәлиев. Россия ягыннан аны тормышка ашыру бәясе – якынча 10 млрд сумга якын. Кытай әзер мәйданчык, структура, эшләүче бизнес, ә “Алабуга” 60 яңа резидент һәм күпмиллиардлы инвестицияләр ала.

Тагын бер перспективалы юнәлеш – “Алабуга-2″ мәйданчыгы. Нефть химиясе производстволарын эшләтеп җибәрү буенча чикләүләрне алу өчен индустриаль парк ачылачак. Ел азагына кадәр Зөя төбәкара мультимодаль логистика үзәге резидентлары исемлеген төзәргә туры киләчәк.

Татар әдәбиятыннан имтиханны республикада нибары бер укучы гына тапшырган

Татар әдәбиятыннан имтиханны республикада нибары бер укучы гына тапшырганМөслим кызы үзенең китап яратуының сәбәбен 20 хуҗалыклы авылда тууы белән аңлата

 (Казан, 11 июль, “Татар-информ”, Сәрвәр Хафизова). Быел Татарстанда 11 нче сыйныф укучылары арасында татар әдәбиятыннан имтиханны нибары бер генә укучы тапшырган. Бу хакта Татарстан Республикасы Фән һәм мәгариф министрлыгының милли мәгариф бүлеге җитәкчесе Алсу Шәрипова хәбәр итте.Бердәнбер укучы Флүзә Гиздуллина Мөслим районының 20 хуҗалыклы Сикия авылында яши. Татар теленнән – 92, рус теленнән – 91, әдәбияттан – 72 балл җыйган, ә математикадан база өлешеннән “5”ле алган. Тик кызганыч, шулкадәр тырышып укыса да, вузга үзе теләгән белгечлек буенча укырга керә алмаячак.

Флүзә татар теле һәм әдәбияты укытучысы булырга хыялланган. Укытучысы, теория өлеше бик авыр бит, дип кисәтсә дә: “Миңа укырга керү өчен шул фән кирәк”, – дип җавап биргән. Ләкин Флүзә җәмгыять белеменнән БДИ бирмәгән. Шуңа күрә аны бу белгечлеккә кабул итмәгәннәр. Хәзер көллияттә башлагыч сыйныф укытучысына укырга җыена. “Татар әдәбиятыннан сынауны берүзем тынычлап бирдем. Әмма биремнәр катлаулы иде”, – ди ул.

“Флүзә безнең мәктәпкә 9 нчы сыйныфны тәмамлагач килде. Мин дәрестә берәр зур романнардан өзек китерсәм, икенче көнгә ул инде аны укып та килә иде. Үзе дә башка китапларны сорап укыды. Мин аңа анализ ясарга өйрән дип күп итеп китаплар биреп җибәрә идем. Әле барысын җыеп, пакетларга тутырып китергән. Мин белмәгән нәрсәләрне дә белә иде хәтта. Мин аңа этәргеч кенә биргәнмендер дип уйлыйм. Ул үзе бик кызыксынучан, тырыш кыз. Сыйныфыбызда матур әдәбият белән кызыксынучы балалар шактый иде. Күбесенә әдәбияттан “5ле” куйдым”, – ди Габдулла Тукай исемендәге Мөслим урта мәктәбенең татар теле һәм әдәбияты укытучысы Гөлчәчәк Даутова.

Флүзә әйтүенчә, ул китапны бер көндә дә укып чыга ала. Гадәттә көнгә 4 сәгать укырга тырыша. Үзенең ничә китап укыганын санамаган. Аларның саны бик күп, ди. Татар, рус, чит ил әдәбиятын – барысын да укый. Китапны исә интернеттан түгел, кулына тотып укырга ярата. Башкача аның тәмен тоймый. Бигрәк тә Әмирхан Еники, Һади Такташ, Фатыйх Кәрим, Хәсән Туфан иҗаты күңеленә якын.

Классик әсәрләр бүген дә популяр

Самараның 5 санлы балалар китапханәсендә инде берничә ел рәттән

әдәби марафон үткәрелеп килә

- Әдәби марафон нәни укучыларыбызны китап укырга кызыксынуларын үстерү теләге белән оешты-рылган иде. Максатыбызга ирештек, дип уйлыйбыз, чөнки марафонда беренче елларда Киров районының өч мәктәбе укучылары гына катнашса, быел Совет, Промышленность районнарыннан да берничә мәктәп укучылары кушылды, – дип сөйли китапханә җитәкчесе Елена Садовникова.

Чара узган вакыт эчендә бу китап йортында Самараның берничә иҗади коллективы кунакта булып киткән. 115 санлы интернат-мәктәпнең курчак театры түгәрәгендә шөгыльләнүче бер төркем китапханә укучыларына “Теремок” әкиятен, ә “Кентавр” яшүсмерләр клубы әгъзалары язучы Самуил Эйдлинның “Бөтен дөньяның байлыгыннан да кадерлерәк” (“Дороже всех сокровищ мира”) әсәрен күрсәткәннәр. Бер атнага якын барган бу әдәби бәйге матур бәйрәм белән тәмамланды. Анда кунакларны китапханә методисты Ирина Паршикова сәламләде.

- Быелгы марафон Россия кино елына багышланганга балалар сайлаган китапның эчтәлеге буенча кинофильм төшерелгән булуы шарт иде. Рәсемнәр, афоризмнар белән бизәлгән рефератлар, презентацияләр безгә яңгыр кебек яуды, шуңа алар арасыннан җиңүчеләрне сайлап алу да бик кыен булды. Иң шәп эшләр тәкъдим иткән укучыларыбыз бүген сезнең алда чыгыш ясаячак, ә жюри әгъзалары алар арасыннан җиңүчеләрне сайлап алыр, – диде ул.

«Ак калфак»лылар эшсез утырмыйлар!

Кичә, 24 Рамазан ае кичендә,  «Дуслык» иҗади-иҗтимагый оешмасы канат астында эшләп килгән  «Ак калфак» оешмасы әгъзәлере мастер-класста очраштылар. «Ак калфак» оешмасының рәисе Разия-ханым Аюпова, җыелган хатын- кызлар өчен кулъяулыклар чегү һәм кулъяулыкның очларын крючок белән бизәргә өйрәтте. Бу җыелыш, «Ак калфак» оешмасының Бөек җиңү көненә әзерләнү максатыннан, чөнки чегү бик тиз эш түгел, шуңа күрә  хәзердән әзерләнә башларга кирәк, дип ачыклады Разия-ханым.

S1340019

S1340042Разия-ханым игътибарлы итеп бар хатын-кызларга күрсәтеп- өйрәтте

Кубань хакимияте Сириядә һәлак булган очучы Рәфәгать Хәбибуллин гаиләсенә миллион сум түләячәк

Рәфәгать Хәбибуллин белән хушлашу чарасы 12 июль көнне Краснодар крае Кореновск шәһәрендә узачак

(Казан, 11 июль, «Татар-информ»). Краснодар крае Сириядә һәлак булган 55нче аерым хәрби авиация полкы командиры, полковник Рәфәгать Хәбибуллинның гаиләсенә ярдәм күрсәтәчәк. Бу хакта төбәк башлыгы матбугат хезмәтенә сылтама белән “Интерфакс” агентлыгы яза.

“Губернатор йөкләмәсе буенча очучының туганнарына бер миллион сум күләмендә акчалата ярдәм күрсәтеләчәк”, – дип белдергән агентлык әңгәмәдәше.

2016 елның 8 июлендә Россия хәрби очкыч-инструкторлары Ми-25 вертолетында хәрби биремне үтәгәндә “Ислам дәүләте” (ДАИШ, Россиядә тыелган) террорчылык төркеме тарафыннан бәреп төшерелгән һәм Сирия Хөкүмәте армиясе контролендәге территория тирәсенә төшкән. Экипаж әгъзалары – командир Рәфәгать Хәбибуллин һәм очучы-инструкторы Евгений Долгин һәлак була.

Рәфәгать Хәбибуллин белән хушлашу чарасы 12 июль көнне Краснодар крае Кореновск шәһәрендә узачак, шул ук көнне Ульяновск өлкәсе Иске Кулатка районының Вязовый Гай авылында җирләнәчәк.

Йөз еллык юбилееңда әле тагын очрашырбыз, Дәүләткол!

Камышлы районының Дәүләткол авылында Сабан туе үткәрелгән көнне иртәнге якта яңгыр сибәләп торса да, бераздан болытлар таралып, ялтырап кояш чыкты. Милли бәйрәмнең шушы авылның 95 еллык юбилеена багышлануын аңлаткандай, агачтан-агачка кунып, кошлар сайрый башлады. Ә тау өстендә урнашкан Сабан туе мәйданы тәмле урман исләренә күмелде.

Мәйдан тирәли җыелышкан дәүләтколлылар, читтән кайткан авылдашлар, тирә-яктан килгән кунаклар үзара көлешеп, сөйләшеп торганда, тау башыннан күңелләрне җилкендереп, сихри гармун тавышы ишетелде. Җанга газиз ата-бабаларыбыз моңы яңгыраган шул якка борылып карасак, ни күрик, матур милли киемнәрдән Дәүләткол авылы клубының “Дисәнә” фольклор ансамбле коллективы гармунчы Рәшит Дәрҗемановның гармун моңына кушылып, җырлый-җырлый таудан төшеп килә иде. Кулларына тоткан колгага сөлгеләр бәйләгәннәр. Менә алар кунаклар янына Сабан туе мәйданына килеп керделәр.

Бергәләп биешеп алганнан соң, ниһаять, мәйданда тамашаны алып баручы Зөлфия Дәрҗеманованың ягымлы тавышы яңгырады. Ул килгән кунакларны, тамашачыларны сәламләгәч, бүгенге Сабан туеның Дәүләткол авылының 95 еллык юбилеена багышланып үткәрелүе турында әйтеп, Габдулла Тукайчалап:

“Кол Шәриф” мәчете яңа кәгазь акчалар өчен символлар исемлегендә

Ил тарихында беренче тапкыр яңа акча билгеләрендә нәрсә сурәтләнәчәген россиялеләр үзләре тәкъдим итә ала

(Казан, 11 июль, «Татар-информ»). “Кол Шәриф” яңа банкноталар өчен символлар исемлегендә пәйда булды, дип хәбәр ителә твоя-россия.рф порталында. Мәчет Россиянең тугыз федераль округы символлары картасында билгеләнде, элегрәк аңа Казан Кремле дә кертелгән иде.

Искәртеп узыбыз: 200 һәм 2000 сумлык яңа купюралар өчен символлар сайлауны Россия банкы игълан итте. Ил тарихында беренче тапкыр яңа акча билгеләрендә нәрсә сурәтләнәчәген россиялеләр үзләре тәкъдим итә ала. Сайлау өч этапта узып, 2016 елның 7 октябрендә тәмамланачак.

8 июльгә твоя-россия.рф сайтында яңа банкноталарга символлар өчен 450 мең кеше тавыш биргән. Кулланучылар 3,7 меңнән артык символ тәкъдим итсә дә, 5 мең тавыш чиген нибары 15е генә узган.

Яңа банкноталарга шәһәр символларын 28 июльгә кадәр тәкъдим итеп була.

“Ак калфак” иҗтимагый оешмасы Актанышка юл тота

“Ак калфак” иҗтимагый оешмасы Актанышка юл тота

Биредә милли йолалар, авыл туризмы юнәлешендә бик күп чаралар үткәреләчәк

(Казан, 11 июль, “Татар-информ”, Гөлнар Гарифуллина). “Ак калфак” бөтендөнья татар хатын-кызлары иҗтимагый оешмасының чираттагы күчмә утырышы Актанышта булачак. Әлеге оешманың Бөтендөнья татар конгрессы башкарма комитеты каршында барлыкка килгәнен искәртик. 13, 14, 15 июль көннәрендә Актанышта узачак чаралар турында “Татар-информ” мәгълүмат агентлыгы хәбәрчесенә оешманың рәисе Кадрия Идрисова сөйләде.

Актанышка сәфәрдә Татарстанның 32 районыннан, Россиянең 22 төбәгеннән вәкилләр, Таҗикстан, Австралия, Беларусь, Польша, Казакъстан, Төркмәнстаннан 10 кунак катнашачак. Барлыгы 150 ләп делегатның авылларга 5 төркемгә бүленеп баруы ниятләнә.

“Безнең максат – бу җирлектәге йолаларны, татар халкының яшәешен өйрәнү, танылган шәхесләрен барлау һәм авыл туризмы өлкәсендә чаралар уздыру”, – дип белдерде Кадрия Идрисова.

Ислам университеты төзелә башлады

19 – 21 майда Татарстан башкаласы Казанда “Милли тормыш һәм дин” дип аталган

VII Бөтенроссия татар дин әһелләре форумы үткәрелде

Форумда Татарстан Республикасыннан һәм Россия Федерациясенең 67 төбәгеннән 900 делегат катнашты. Самарадан да җыенга тулы бер автобус – 45 дин әһеле барып кайтты. Аннан кайткач, Региональ Диния нәзарәте рәисе, мөфти Талип хәзрәт ЯРУЛЛИН белән очраштык.

- Быел форумга әлегә кадәр Болгарны күрмәгән мөфтиләрне, имамнарны һәм мәчетләребезнең актив әгъзаларын алып бардык. Шулай эшләгәндә, борынгы Болгарыбызны күбрәк кешеләр күрә ала, татарның кайдан чыкканы, тамыры кайдан булуын белә башлый. Гомумән, үзен татар дип белгән һәр кеше Болгарга барып, борынгы бабаларыбызга зиярәт кылып кайтырга тиеш, дип уйлыйм.

Безнең автобус Казанга барып җиткәндә иртәнге тугызлар тирәсе булгандыр. Кунакханәләргә урнашып беткәч, безне төрле биналарда – “Казан” үзәге, Университет, Мәдәният министрлыгы, Фәннәр академиясендә урнашкан секцияләргә бүлделәр. Без “Татар яшьләре һәм ислам дине” секциясенә туры килдек. Җитәкчебез дә бик зыялы, бик укымышлы имам Җәлил хәзрәт Фазлыев иде. Ләкин Самара татарлары да төшеп калганнардан түгел. “Яктылык” татар мәктәбе директоры Радик Рифкать улы Газизов сүз алып, яшьләр арасында уздырыла торган чаралар, конференцияләр һәм форумнар, җәйге лагерьларда алып барыла торган дини тәрбия эшләре турында тәфсилләп сөйләгәч, Җәлил хәзрәтнең хуплавын ишеттек. Казаннан читтә яшәп тә татар мәктәпләре, мәчетләр, мәдрәсәләр булдырасыз, дин һәм мәгариф өлкәсендә хәерле хезмәт күрсәтәсез, дип күңелләребезне үсендерде ул.

Ураза гаетендә Казан җәмәгать транспорты 4.30 сәгатьтә йөри башлый

5 июльгә җәмәгать транспорты өчен махсус режим пассажирларны бәйрәм намазына алып бару өчен кертелә

(Казан, 1 июль, «Татар-информ»). Быел 5 июльдә билгеләп үтелә торган Ураза гаете көнендә Казанның җәмәгать транспорты махсус режимда эшләячәк. Автобуслар һәм троллейбуслар пассажирларны бәйрәм намазына алып бару өчен 4.30 сәгатьтә маршрутка чыгачак, дип хәбәр итте шәһәр Башкарма комитетының Транспорт комитеты.

1, 2, 5, 6, 10, 10а, 15, 23, 29, 30, 31, 35, 35а, 37, 47, 53, 54, 56, 63, 68, 74, 74а, 75, 91-нче номерлы автобус һәм 1, 2, 12-нче номерлы троллейбус маршрутлары шәһәрлеләрне Казан мәчетләрендәге бәйрәм чараларына илтеп җиткерәчәк.
5 июльдә Татарстанның барлык мәчетләрендә бәйрәм намазы 6.30 сәгатьтә башланачак. 7.00 сәгатьтә гает намазы башлана, соңыннан хөтбә укылачак.
Татарстан башкаласында, Ураза гаете уңаеннан, төп чаралар республика мөфтие Камил хәзрәт Сәмигуллин катнашында Галиев мәчетендә узачак.

Татарлыкны саклау өчен рус телендә дә мәкаләләр бастырабыз – “Татар дөньясы” газетасы редакторы

Татарлыкны саклау өчен рус телендә дә мәкаләләр бастырабыз  – “Татар дөньясы” газетасы редакторы

Фото:Рамис Латыпов

 Омскида чыгучы “Татар дөньясы” газетасы редакторы милли матбугатның иң зур проблемасын тел бетүдә күрә
 (Казан, 1 июль, “Татар-информ”). VI Төбәк һәм милли массакүләм мәгълүмат чаралары форумында катнашучы “Татар дөньясы” газетасы редакторы Гөлсинә Әхмерова фикеренчә, төбәкләрдә татар телен саклап калу юллары икәү генә – мәктәптә укыту һәм гаиләдә өйрәнү.

Омск өлкәсендә 2003 елдан бирле чыгып килүче “Татар дөньясы” газетасының тиражы бүгенге көндә 2500 данә тәшкил итә. Гөлсинә Әхмерова газетада татарча да, русча да материаллар бастыруларын әйтте. Рус телендә милли темаларга язмалар татар телен белмәүче милләттәшләрнең татарлыгын саклап калырга мөмкин, дигән фикердә ул.

“Төбәкләрдә татар теле юкка чыга, шуңа милли матбугатның хәле аяныч ”, – диде Гөлсинә Әхмерова. Аның фикеренчә, телне бары тик ике генә юл белән саклап була – аны мәктәптә укытып һәм гаиләдә өйрәтеп. Омск өлкәсендә татар теле факультатив буларак шәһәрдәге бер генә мәктәптә, төбәктә 15 мәктәптә керә. Хәтта электән үк милли укытуга көчле басым ясаган Үләнкүл авылы мәктәбендә дә татар теле предмет буларак берничә сыйныфта гына калган. Әмма, журналист сүзләренчә, татар теле дәресләре рус телен укытуга зыян салмый: Үләнкүл мәктәбе укычыларының халыкара рус теле олимпиадасында урыннар алуы – моңа дәлил.

Гөлсинә Әхмерова татар телен укыту проблемасын хәл итү юлын да билгеләде. “Мәктәпләрдә 4 базис планы тәкъдим ителә, ата-аналар, мәктәп берсен сайлап, шуның буенча балаларын укыта ала. Шул рәвешле татар телен дә укытып булыр иде”, – дигән фикер җиткерде ул.

Мөселманнар Кадер кичәсен көтә

Ул Рамазан аеның соңгы 10 көнендә була

(Казан, 1 июль, “Татар-информ”, Лилия Локманова). Мөселманнар өчен айлар арасында Рамазан ае, көннәр арасында җомга көне, кичләр арасында Кадер кичәсе иң мөбарәк санала. Кадер кичәсе Рамазан аеның соңгы ун көне арасындадыр, ул төгәл билгеләнмәгән. Мөселманнар аны бүген булыр дип өметләнә. Бу көннәрне гыйбадәт кылып, догалар укып, тәүбә итеп уздырырга кирәк.Казан шәһәренең “Ярдәм” мәчете имамы Илдар хәзрәт Баязитов “Татар-информ” МА корреспондентына белдергәнчә, Кадер кичәсе Рамазан аеның 27 нче көненә туры килә, әмма бу төгәл билгеле түгел. “Бу Ходайга гына мәгълүм, шулай да без өметләнеп көтәбез инде”, – диде хәзрәт.

“Кадер кичәсе мең айдан да хәерлерәк, савабы мең ай кылган гыйбадәттән артыграк”, – диелә Коръән Кәримнең 97 нче “әл-Кадер” сүрәсенең 3 нче аятендә. Кадер кичәсендә Коръән Кәрим иңдерелә башлый. Коръән соңрак егерме өч ел дәверендә Җир йөзенә кисәк-кисәк иңдерелә.

Бу хакта Раббыбыз Кадер кичәсе турындагы аерым сүрәдә ачык аңлаткан: «Иннәә әңзәлнәһү фи ләйләтил Кадр. (Хакыйкать шулдыр ки, Без аны (Коръәнне) Кадер кичәсендә иңдердек.) Вә мә әдракә мә ләйләтуль Кадр. (Кадер кичәсенең нәрсә икәнен сиңа аңлатучы булдымы?) Ләйләтуль Кадери хайрум мин әлфи шәһр. (Кадер кичәсе мең айдан да хәерлерәк.) Тәнәззәлүл мәләикәтү вәр-руху фиихә биизни раббихим мин күлли әмр”. (Ул көндә фәрештәләр вә Изге Рух (Җәбраил), Раббының рөхсәте илә, Аның әмерләрен җиренә җиткерер өчен, бер-бер артлы иңеп кенә торырлар.) Сәләмүн һия хәттә мәтләгыль фәҗер.(Кадер кичәсе – иминлек кичәсе – таң ата башлаганга чаклы дәвам итәр.)».

Татарстанда коточкыч зур еланга тап булганнар (ФОТО)

Быел еланнар артык күп, дигән фикер дөреслеккә туры килә булып чыкты. Элегрәк тә Балтач районының «аскы ягы»ннан (халыкта Малмыж ягындагы авылларны шулай атыйлар) кайткан печәннән елан чыккан очраклар булган.

Әмма моның кадәрлесе тәүге тапкыр.

Павел Астахов Рөстәм Миңнеханов белән Әсгать Сәфәровка рәхмәт белдергән

Омбудсмен аларга Истанбулдан балалар бию коллективын эвакуацияләүдәге ярдәме өчен рәхмәт әйткән

(Казан, 30 июнь, «Татар-информ»). РФ Президенты карамагындагы бала хокуклары буенча вәкаләтле Павел Астахов instagramдагы битендә: “БИСЕРИНКИ балалар бию ансамбле Истанбулдан Россиягә исән-имин кайтып җитте. Көтмәгәндә Истанбул аэропортындагы теракт “тоткыны” булган 15 кыз (11-12 яшь) иртә таңнан Казанга кайтып җитте. Татарстан җитәкчеләре, шәхсән Р.Н.Миңнехановка һәм Ә.А.Сәфәровка кызларны оператив төстә коткарган өчен бик зур рәхмәт! Балаларны саклагыз!” – дип язган.

Искәртәбез: Чаллы балалар бию коллективы Истанбул аша Болгариядә узган конкурстан кайта иде. 15 бала һәм аларны озата йөрүче җитәкчеләре “яшел коридор”ны узган вакытта, аэропортта шартлау яңгыраган. Рейсны кичектерделәр һәм балалар документларсыз һәм акчасыз чит илдә калырга мәҗбүр булды. Республика җитәкчелеге тиз арада балаларны Татарстанга кайтару мәсьәләсен хәл итте. Хәзерге вакытта “Бисеринки” кызлары өйләрендә инде.

Истанбул һава аланындагы шартлауларны оештыручылар билгеле

Шартлаулар чыгышлары белән Россия, Үзбәкстан һәм Кыргызстаннан булган кешеләр тарафыннан оештырылган

(Казан, 30 июнь, “Татар-информ”). Истанбулның Ататөрек исемендәге һава аланындагы шартлауларны чыгышлары белән Россиядән, Кыргызстаннан һәм Үзбәкстаннан булган кешеләр оештырган. Бу хакта, Рейтер агентлыгына сылтама белән, “РИА новости” хәбәр итә.

Исегезгә төшерәбез, 28 июнь кичендә Истанбулның Ататөрек исемендәге халыкара һава аланында өч шартлау булды. Соңгы мәгълүмат буенча, теракт нәтиҗәсендә 42 кеше һәлак булган, шул исәптән 13 чит ил гражданы. 239 кеше яраланган.

Төркия Премьеры Бинали Йылдырым хәбәр иткәнчә, җыелган дәлилләр терактның “Ислам дәүләте” (ДАИШ, Россия Федерациясендә тыелган) тарафыннан оештырылганлыгын күрсәтә. 

Милли матбугат – туган телне һәм мәдәниятне саклап калу чарасы – Маргарита Лянге

Милли матбугат – туган телне һәм мәдәниятне саклап калу чарасы – Маргарита Лянге 30 июнь 2016,17:14

 Милли басмаларны саклап калу өчен журналистларга гражданлык институтлары белән актив эшчәнлек алып барырга кирәк дигән фикердә ул
(Казан, 30 июнь, “Татар-информ”, Ләйсән Исхакова). Бүген журналистика матди һәм ышаныч кризисы кичерә. Былтыр илдә басма матбугат тиражы 12 процентка, реклама керемнәре 32 процентка кимегән. Бу хакта бүген Казандагы “Корстон” комплексында Милли һәм төбәк ММЧларының VI форумы кысаларында уздырылган семинарда Этникара журналистика гильдиясе президенты Маргарита Лянге хәбәр итте.

Ул билгеләп үткәнчә, соңгы вакытта редакцияләрдә штат кыскартыла. Кризис шартларында журналистика трансформация кичерә. Бу котылгысыз, чөнки бүген 1-2 кеше белән дә редакция оештырырга мөмкин. Бу, үз чиратында, журналистның берничә эшне берьюлы башкаруын күз уңында тота: ул яза да, фотога яки видеога да төшерә, кирәк икән, видеоязманы монтажлап, эфирга да бирә белергә тиеш. Юк икән, аның урынына башкалар килә, дип сөйләде Маргарита Лянге.

Шулай да, аның сүзләренчә, кризис шартларында күсәкнең иң авыр башы басма милли матбугат чараларына төшә: аларга катгый көндәшлек шартларында эшләргә туры килә. Укучылар саны көннән-көн кими. Моңа билгеле бер дәрәҗәдә “тел киртәсе” дә йогынты ясый, чөнки милли телләрдә укучылар гына түгел, сөйләшүчеләр дә азая. Әмма милли басмаларны саклап калу бик мөһим, чөнки алар туган телне һәм мәдәниятне саклап калу чарасы булудан тыш, еш кына беренчел мәгълүмат чыганагы булып та хезмәт итә. Милли матбугат аудиториягә тугрылыгы, һәркемгә якын, әһәмиятле, кызыклы булырдай темаларны яктыртуы белән аерыла.

Маргарита Лянге фикеренчә, милли матбугат чараларын саклап калу өчен журналистларга гражданлык институтлары белән актив эшчәнлек алып барырга кирәк. Ул басмаларның интернет-версиясен үстерү, штат санын кыскартып, булган хезмәткәрләрне “мультимедиалылык”ка өйрәтү, төрле акцияләр, бәйгеләр һәм башка кызыклы чаралар үткәреп, үз-үзеңне рекламалау, шул рәвешле, аудиториядә генә түгел, хакимияттә дә ММЧга карата лояль караш булдыру мөһимлеген ассызыклады. Киләсе 5-7 елда журналистика тармагының гаҗәеп үзгәрешләргә дучар булачагын билгеләп, алардан курыкмаска өндәде.

Искәртеп үтик: Милли һәм төбәк ММЧларының VI форумында Россиянең 25 субъекты: Әстерхан, Киров, Мәскәү, Түбән Новгород, Омск, Оренбург, Самара, Сарытау, Свердловск, Пенза, Төмән, Чиләбе, Ульяновск өлкәләре, Татарстан, Башкортстан, Мари Эл, Удмуртия, Чуашстан республикалары, Ханты-Манси автономияле округы һәм башка төбәкләрнең матбугат чараларының 230 вәкиле катнаша. Форумның пленар утырышы иртәгә, 1 июль көнне, “Корстон” комплексында була.

Буада яңа мәдрәсә салына

Хәзерге мәдрәсәдә урын җитми

(Казан, 30 июнь, “Татар-информ”). Буада яңа мәдрәсә төзелә башлады. Бу хакта районның “Байрак” газетасы хәбәр итә.

Дөресен әйткәндә, тарихи урынына кайтарып салынган гамәлдәгесе дә чагыштырмача яңа ич әле. Тагын бер мәдрәсә төзү кирәкме, дигән сорау куя газета.

“Хәзер мәдрәсә урнашкан урында элек тулы комплекс булган. Күптән түгел мәдрәсә территориясендәге аннан алынган җирләрне кайтаруга ирештек. Анда май-сыр комбинаты биналары иде. Озак “эшсез” тордылар. Безгә территорияне анда мәдрәсә төзү шарты белән кайтардылар. Гамәлдәге гыйлем алу йорты гөрләп тора. Анда яшь шәкертләр дә, олылар да дин сабагы алалар. Мәдрәсәдә укучыларга кысан була башлады. Күз алдына китерегез, шунда тулай торак, ашханә, уку бүлмәсе, уңайлыклар чамалы гына. Яңа бинада, иншалла, барысы да әйбәт булыр иде. Территорияне дә төзекләндерергә уйлыйбыз”, – дип белдерә директор Рәшит хәзрәт Маликов җирле басмага.

Мәдрәсә тарихи урынына кайтарыла. Элеккеге мәдрәсә агачтан булган, хәзер таштан төзелә. Тәрәзәләрдә, кәрнизләрдә элеккеге мәдрәсәнең архитектура стиле кабатланачак. Гамәлдәге мәдрәсәдә дә тәрәзәләр элеккечә ясалган.

2015 елның 10 октябрендә булачак мәдрәсәнең истәлек ташы салынган. Төзелешкә халык, оешма-предприятиеләр хәлдән килгәнчә ярдәм итә. 500 мең сум акча хәйрия акчасы җыелган. Бу эшкә буалыларның өлеш кертүләренә ышаналар. Бу хакта “Байрак” газетасы хәбәр итә.

“Ярдәм”дә бүгенге ифтар Төркиянең Казандагы Генераль консуллыгы булышлыгында үткәрелә

Иртәгә исә рамазан чатырында – ”Журналистика һәм әдәбият” көне

 (Казан, 29 июнь, “Татар-информ”). Күрү сәләтен югалткан кешеләрне укыту-тернәкләндерү эшләре белән гомуммәгълүм “Ярдәм” үзәге һәм мәчете биләмәләрендә быел да рамазан ае дәвамында ифтар ашлары уздырыла. ТР Диния нәзарәте андагы рамазан чатырында бүгенге ифтарны Төркия Республикасының Казандагы Генераль консуллыгы ярдәмендә үткәрә. Бу хакта Генераль консуллык хәбәр итә.

Татарстан мөфтие урынбасары, “Ярдәм” мәчете имам-хатыйбы Илдар хәзрәт Баязитов “Татар-информ” вәкиленә бүгенге ифтарның традицион дини мәҗлес булуын, бер яктан да үзгә түгеллеген әйтте. Казанда яшәүче төрекләр дә киләчәкме икәнлеге турында мәгълүматы булмавын әйтте. Сукырлар, начар күрүчеләр һәм мәчетебезгә даими йөрүчеләр булачагын әйтте. “Төркия консуллыгы былтыр да ифтар уздыруда катнашкан иде, бу шушы матур багланышның дәвамы”, – диде Илдар Баязитов.

Иртәгә исә рамазан чатырында – ”Журналистика һәм әдәбият” көне үткәрелә. Рамазан аенда “Ярдәм” мәчете чатырына ифтарга журналистларны, язучыларны, шагыйрьләрне бергә җыю традициягә әйләнде. Ул инде 3 нче ел рәттән шулай үткәрелә. Чираттагы ифтарда милли-мәдәни, шигъри программа тәкъдим ителәчәк. Шагыйрьләр яңа дини шигырьләрен укый, әдипләр хикмәтле сүз әйтәчәк, дип вәгъдә бирде аны оештыручы “Ярдәм” фонды.

Чаллының “Бисеринки” коллективы Истанбулдан Казанга очты

Татарстанда елан чагу очраклары тагын да арткан

Соңгысы очрак кичә теркәлгән

(Казан, 30 июнь, “Татар-информ”, Лилия Локманова). Казанда елан чагудан зыян күргән кешеләр саны 6 га җиткән. Мондый очракның соңгысы кичә теркәлгән, республика буенча — 27очрак. Бу хакта “Татар-информ” агентлыгы корреспондентына Токсикология үзәге җитәкчесе вазифасын башкаручы Алия Насыйбуллина хәбәр итте.

Соңгы 5 ел эчендә елан чагып, Казандагы Токсикология үзәгенә мөрәҗәгать итүчеләр арасында үлү очраклары булмаган. “Елан чагудан кеше үлми. Моның өчен еланнар оясына эләгергә кирәк. Бит һәм муен тирәсен чакса гына кеше һәлак булырга мөмкин. Шулай ук елан агуы балаларны үтерергә мөмкин. Кара еланда кешең аңын җуйдырырлык яки комага китәрлек нейротроп агу юк”, – дип аңлатма бирде табибә. Аның сүзләренчә, кара еланның агуы канның оешучанлыгына тәэсир итә. Бу исә зыян күрүчедә тромбоза (кан тамырларында кан төерләре) китереп чыгарырга мөмкин.

“Кан тамырларыннан кан элеккечә аксын өчен, елан чакканнан соң жгут салырга ярамый. Чөнки, нәтиҗәдә, очлыкны саклап кала алмавыбыз бар. Әгәр дә барлык кагыйдәләр дә үтәлә икән, еланнан зыян күрүчеләр 3-4 көндә хастаханәдән чыга”, – диде Алия Насыйбуллина.

Фамилиясен әйтергә теләмәгән Әлфия ханым елан чакканнан соң 6 көн Кайбыч район хастаханәсендә ятып чыккан. “Елан җиләк җыйганда, тау башында чакты. Мин аны күрмәдем дә, кара башы гына чалынып китте. Башым әйләнә, йөрәгем каты тибә башлады. Беренче ярдәмне авылдагы шәфкать туташы күрсәтте. 2 сәгать үткәнче, район хастаханәсенә барып җиттем. Анда агуга каршы дарулар биреп, уколлар кададылар”, – диде зыян күрүче.

Сүз уңаеннан: Татарстанда ике төрле агулы елан бар – кара елан һәм бакыр елан. Табибларга мөрәҗәгать итүчеләрнең күпчелеген кара елан чаккан булган.

“Рубин” тренеры: “Без Россия чемпионатының беренче турына көчле хәлдә керешергә тиеш”

"Рубин" тренеры: "Без Россия чемпионатының беренче турына көчле хәлдә керешергә тиеш"<br />

Фото:Михаил Захаров

Казан клубы быелгы ике сезон арасында икенче ачык күнегү үткәрде

(Казан, 28 июнь, «Татар-информ», Сергей Гаврилов, Гөлшат Ганиева). Бүген Казанның “Рубин” клубы үзенең “Крылья Советов” паркындагы базасында быелгы ике сезон арасында икенче ачык күнегүне үткәрде. “Татар-информ” агентлыгы хәбәрчесе күнегүләрнең беренче 20 минутын күзәтеп, команданың баш тренеры Хавьер Грасиянең чираттагы дипломатик чыгышын ишетте.

“Рубин” составында беренче яңа уенчы, Швейцария сакчысы Мориц Бауэрның пәйда булуын әйтеп узарга кирәк. Ә менә икенче яңа уенчы, Испания саксычы Серхио Санчес мәйданчыкта күренмәде. Владимир Дядюн белән Данияр Билалетдинов та яңа состав белән шөгыльләнмәде. Күптән түгел операция салган Олег Кузьмин уен кырына таякка таянып һәм Сергей Рыжиков ярдәмендә чыкты.

Грасия Кузьминның кайчан сафка басачагын әйтмәде, бары “Рубин” капитанының сезон башында уеннарда катнашмаячагын гына аныклап үтте.

Журналистлар белән аралашкан вакытта остаз авызыннан бернинди яңалык та ишетелмәде, әмма Казан клубы белән үткәргән беренче эш атнасыннан канәгать калуын таныды.

“Беренче атна бик яхшы узды. Алда иптәшләрчә матчлар, Австриядә узачак җыеннар вакытында тизлекне арттырачакбыз. Составны көчәйтү дәвам итә, эшләр тулы куәтенә бара, без Россия чемпионатының беренче турына көчле хәлдә керешергә тиеш”, – диде Грасия.

29 июнь көнне “Рубин” Австриягә җыенга китә, анда 1 июль көнне Венаның “Рапид” командасы, аннары кайбер Англия командалары белән уйнаячак. Җыен программасы  “Рубин”га Грасия килгәнче төзелгән булган. “Мин спарринг-партнерларны бик җентекләп сайлыйм, – дип шәрехләде уен челтәрен казанлыларның остазы. – Иң мөһим эш күнегүләр кырында бара дип саныйм”.

“Рубин”ның ике сакчы сатып алган трансфер кампаниясе турында сөйләгәндә, Грасия команда нәкъ менә сактан төзелергә тиешлеген белдерде. “Йорт нигездән башлап салына, ә соңыннан күп катлар төзергә була. Барысы да акрынлап эшләнелә. Без уенчыларны базар вазгыятенә карап сатып алдык, җиңелрәк алып булганнарны сайладык. Башкаларына караганда, нәкъ менә сакчы позицияләрен ябу җиңелрәк булды”, – диде ул.

Грасия беренче Австрия җыенында команданың составын атап тормады. “Хәзерге вакытта команда белән шөгыльләнүчеләр җыенга барачак. Бәлки без үзебез белән яшьләр составының берничә уенчысын да алырбыз. Мин үз карамагымда булган футболчыларны күзәтүне дәвам итәм. Бары шуннан соң гына көчәйтү турында әйтеп булачак”, – дип аныклап узды команда остазы.

Уен кырында булмаган Дядюн, Билалетдинов һәм башка футболчылар турында сөйләгән вакытта Грасия алар буенча карарлар “Рубин”га ул килгәнче үк кабул ителгән булуны әйтте. “Әлеге уенчылар дубльдә түгел. Мин Казанга килгәнче үк төп составта һәм яшьләр составында уйнаячак футболчылар исемлеге бар иде. Мин әлеге уенчылардан канәгать түгел дияргә ярамый”, – дип белдерде ул.

 

Мәскәү татар яшьләре “Рамазан чатыры”нда катнаша

Мәскәү татар яшьләре “Рамазан чатыры”нда катнаша

Фото:shater-ramadana.ru

Яшьләр үзләре дә ифтарлар оештыра

(Казан, 28 июнь, “Татар-информ”, Ләйсән Исхакова). Мәскәүнең Мемориаль мәчете каршындагы мәйданда оештырылган “Рамазан чатыры”нда бүген яшьләр кичәсе уздырыла. Анда Мәскәү татар яшьләренең дә катнашып чыгыш ясавы көтелә. Бу хакта “Татар-информ” вәкиленә Татарстан Республикасының Россия Федерациясендәге Тулы вәкаләтле вәкиллеге карамагындагы Яшьләр советы рәисе Эмиль Фәйзуллин хәбәр итте.

“Рамазан чатыры” – Мәскәү мөселманнары Диния нәзарәте тарафыннан, РФ мөселманнары Диния нәзарәте һәм Мәскәү Хөкүмәте ярдәме белән, ел саен оештырыла торган үзенчәлекле агарту-мәдәни проекты. Чатыр көн саен 600гә якын кешене җыя. Анда мәдәни программалар һәм бәйрәм мәҗлесләре үткәрелә.

Эмиль Фәйзуллин әйтүенчә, Мәскәү татар яшьләре Рамазан аенда аеруча актив. Бүген, әйтик, “Рамазан чатыры”ндагы яшьләр кичәсендә кимендә 50 егет һәм кыз катнашуы планлаштырыла. Алар арасында ифтар мәҗлесен оештыруга ярдәм итүчеләр, ягъни волонтерлар да бар. Программа 19.50дә башлана, ифтар 21.18дә була.

Татар яшьләре үзләре дә бәйрәм мәҗлесләре оештыра. Мисалга, Рамазан ае башында Мәскәү татар мәдәният үзәгендә үткәрелгән шундый ифтарларның берсе 80ләп егетне һәм кызны җыйган. Иртәгә исә башкаланың Битца паркында ифтар оештыру ниятләнә.

Эмиль Фәйзуллин 30 июньдә “Рамазан чатыры”нда Татарстан кичәсе уздырылачагы, анда да татар яшьләренең күпләп катнашачагы турында әйтте.