Кеше көлдерү – җиңел эшме? Без көлдерә һәм көлә беләбезме? Иң моңсу кешеләр ни өчен еш шаярта? Болар хакында «Ни хәл?» сәхифәсенең чираттагы кунагы, юмор остасы Сирин Бәйрәмовтан сораштык.

– Ни өчен нәкъ менә юмор?

– Җырлый белмәгәнгә. КВН белән таныштым да, туктый алмадым. Сәхнәдән залны көлдерү ниндидер бәйлелек барлыкка китерә, җибәрми.

– Биш елдан соң үзегезне кайда күрәсез?

– Өйдә – Чаллыда яки авылда. Белмим, беләсем дә килми.

– Тәнкыйтькә ничек карыйсыз?

– Уңай. Үзем дә теләсә кемне тәнкыйтьли алам.

– Юмор белән тамак туйдырып буламы?

– Шәп сорау (көлә). Ипи һәм ит белән була, ә юмор белән авыррак.

– Гадәттә, иң моңсу кешеләр бик шаян була, дигән сүзләр йөри. Сез бу турыда ни уйлыйсыз?

– Бик еш шулай да була. Әнә, безнең футболчылар тормышта гел моңсу йөри, ә стадионга чыккач, рәхәтләнеп кеше көлдерә!

– Ни хәл? Җәйне озаттык, ничегрәк үтте соң?

– Хәлләр әйбәт, Аллага шөкер. Гаиләм, әти-әнием исән-сау, димәк, зарланып булмый. Җәйнең узып киткәнен сизмәдем дә. Кыш, яз буе корган планнарны, ниятләгән эшләрне башкарырга җитешми калдым. Балыкка да бер-ике генә барылды. Әллә ничек шунда, артык тиз үтте вакыт. Икенче яктан, эшсез да ятмадым, гаиләбез белән диңгезгә барып кайттык. Әле быел мин яраткан помидорларның мул уңыш биргәнен дә исәпкә алсаң… «Отличный» җәй булды!

– Мәш килеп зур «stand-up» концерт әзерләп ятасыз. Ниләр белән шаккатырырга җыенасыз?

– Концертка берничә атна гына калды, әзерлек бара. Мин бу адымга бик озак килдем. Шаккатырырга түгел, көлдерергә җыенам. Хәзер тамашачыны ничек шаккаттырып була? Яңа технологияләр кулланып, зур перфоманс ясап, яисә Мәскәү йолдызын чакырып шаккатырып була. Тик әлегә андый мөмкинлекләрем юк, ә менә кеше көлдерә беләм! Шуңа да килгән тамашачыга яхшы кәеф һәм рәхәтләнеп көлеп, шатланып утырырлык тамаша вәгъдә итәм.

–  Сез әлеге концертны кем өчен әзерлисез  – яшьләрме, әллә өлкән яшьтәге тамашачылар өченме?

– Концертны әзерләгәндә, бу сорау турында уйламадым да. Миңа калса, яшьләр дә, урта буын да, өлкәннәр дә аңлаячак мәзәкләрне.

– Кеше көлдерү дигәннән. Татарда юмор бармы?

– Бар. Элек тә бар иде, киләчәктә дә булачак. Ул үзгәреп тора. Әйе, эстрадада юмористлар кимеде, шаяртулары да еш кына шул бер мәзәккә яки хәмер темасына барып терәлә. Әмма «Мунча ташы» бар. Быел концертларында булдым – рәхәтләнеп көлеп кайттым. Данир Сабиров бар. КВНда «Татнефть» командасы (Әлмәт шәһәре. – Ред.) Россия буенча беренчелекне алды! Үзебездә «Әйдә, шаяРТ!» проекты уңышлы гына эшләп килә. Интернетта да бик мәзәк татар блогерлары бар. Минемчә, тиздән берничә яшь юмор остасы тамаша залларын тутырачак.

Тик безнең юмор урысларныкыннан аерыла, гәрчә без аларга охшарга тырышсак та. Беренчедән, ул «чиста», икенчедән, без кешедән, нинди дә булса хәлдән ямьсез итеп көлмибез, бездә «ягымлы юмор» популяр. Еш кына татар мәзәкләрен урыслар аңламый, көлми. Ә аларныкын татарчага тәрҗемә итсәң, шулай ук тәме югала. Кабатлаулар булса да, безнең үз юлыбыз бар.

– Шаяра белү – сәләтме ул?

– Сәләт. Эштә, гаиләдә, урамда шәп шаяртучы кешеләр күп ул. «Душа компании» диләр андыйларны. Үзем дә аларны бик яратам. Тик, сәхнәгә менеп, мең кешене берьюлы көлдерә аламы алар? Андыйлар сирәк. Ә инде барыбызга да таныш булган, йөз мәртәбә күргән һәм кичергән проблемага төрттереп, тормыштан алынган мәзәкләр белән көлдерә белгәннәре – осталарның остасы.

– Шаярганнарын аңлый белү нәрсә, шулай ук сәләтме, әллә тормыштан көләргә тормыш үзе өйрәтәме?

– Монысы инде юмор хисе булу яки булмаудан торадыр.

– Сез шактый еллар Данир Сабиров концертларында чыгыш ясадыгыз. Үзегезне икенче план артисты дип тоймый идегезме?

– Данирга мин бик рәхмәтле. Без аның белән коллегалар гына түгел, якын дуслар да. Аның да миңа ярдәм иткән чаклары күп булды, мин дә аңа шактый булыштым. Данирның тормыш иптәше Миләүшәгә дә рәхмәтле мин. Ансыз бу концертлар гел булмас иде! Алар белән эшләү миңа бик күпне бирде.

Афишага «Данир Сабиров» дип язылган икән, димәк, халык аны карарга килгән. Ә инде сәхнәдә басып торучы калган кешеләр – икенче, өченче план артистлары. Мин моны бик яхшы аңлыйм һәм бер дә кайгырмыйм. Концертлар бара, тамашачы йөри, хезмәт хакы түлиләр – тагын нәрсә кирәк инде?!

– Ул концертларга махсус сезне күрү өчен килүчеләр бармы?

– Андыйлар да булгалый инде. Минем өчен генә түгел, баянчыны яки аерым бер биючене яратып килүчеләр дә очрый. Бу – гадәти күренеш.

Лилия Гыймазова