25 гыйнвар – студентлар көн

0
27

Читтә укуы җиңелме?

Татар мәктәпләрен тәмамлаган яшьләребез, Самара гына түгел, башка шәһәрләрдәге ВУЗларга да керәләр

Никтер абитуриентлар, Самараның 35 югары уку йорты арасыннан үзләренә кирәкләсен таба алмыйча, башка төбәкләргә ыргылалар. Сораштырулар нәтиҗәсендә күпчелегенең Казан уку йортларын сайлавы ачыкланды. «Яктылык» татар мәктәбен тәмамлаучылар арасында андый студентлар аеруча күп.

Гыйнвар ахыры студентлар өчен иң авыр чор, чөнки бу вакытта алар мәш килеп кышкы сессияләрен тапшыралар. Шулай да, чит шәһәрләрдә белем алучы як­ташларыбыз, студентлар кө­не алдыннан «Бердәмлек» хә­бәрчесе белән сөйләшеп алырга вакыт таптылар.

Заринә Зарипова, Абдел-Малик Мәүлетов һәм Алсу Садартдинова, «Яктылык» мәк­­тәбен тәмамлап, укуларын Казан федераль универ­си­тетында (КФУ) дәвам итә­ләр, ә Айтурган Осмонова, 2021 елда Мәскәүгә китеп, хәт­­та Михаил Ломоносов исе­мен­­дәге университетка (МГУ) кергән.

Нишләп башка шәһәргә укырга китәргә булдыгыз, ди­­гән соравыма Казан студентлары бала чакларыннан ук татар мохитына, искиткеч архитектуралы борынгы шәһәргә тартылулары турында сөйләделәр. Ә менә Айтурган, илебезнең иң-иң шәп уку йортына кереп, югары белем алу максатын алдына куйган булган.

– Чит шәһәрдә яшәргә авырмы?

– Әти-әниләрдән еракта яшәве кыен билгеле, әмма чит шәһәргә күнегеп, яңа дуслар табуы бер дә авыр булмады, диләр яшьләр. Өстәвенә, Казанда Самара өлкәсеннән килгән студентлар шактый күп икән. Ә Абдел-Малик исә үзен бөтенләй шунда туып-үскән кебек хис итә. Чөнки ул күптән Татарстанның «Сә­ләт» яшьләр клубы әгъзасы һәм Казанда күпсанлы дуслары булу да шуның белән бәйле. Сүз уңаеннан: Абдел-Малик Казанда Бөтендөнья татар конгрессы чакыруы бу­енча укый. Ул халыкара мө­нәсәбәтләр бүлегендә тарих фәнен өйрәнә. «Дусларым ара­сында Кытай, Иран һәм БДБ илләре вәкилләре бар, – дип сөйли егет. – Алар белән йә инглизчә, йә русча аралашабыз, ә татар дусларым белән, хәтта мөгаллимнәр бе­лән дә, татарча сөйләшергә ты­рышабыз», – ди ул.

Заринә инженер-геолог һө­нәрен үзләштерә, ә Алсу юриспруденцияне өйрәнә. Кыз­лар да инде шактый күп дус­лар тапканнар, әмма аларга русча аралашырга туры ки­лә, дип уфтаналар.

«Татарстан башкаласы сез­не ничек каршы алды? Шә­һәр халкы самаралылардан нык аерыламы?» – дип кызыксынам.

Студентларыбыз фике­рен­чә, аерма юк диярлек. Ә менә урам буйлап барганда адым саен татар телен ишетү җанга рәхәт, диләр. «Самарада татар теленең төрле диалектларын ишетергә була. Казанда исә ешрак татар теленең әдәби варианты кулланыла, ул моң булып агыла, күңелләргә май булып ята», – дип сокланалар якташларыбыз. Шулай ук Казан – студентлар башкаласы, дигән фикер белән дә бик теләп килешәләр.

– КФУ үзе бер аерым шә­һәр сыман, – ди Абдел-Малик. – Уку корпуслары, тулай тораклар… Санап бетергесез! Студентлар өчен төрле җә­мәгать эшләрендә катнашу мөмкинлекләре бик күп. Укудан тыш, футбол, волейбол, төрле чаралар оештыруда һәм англо-театр түгәрәгендә шө­гыльләнәм, – ди актив егет.

Кызларыбыз да укуны беренче урынга куялар, университет тормышында да ак­тив катнашалар. Заринә, мәсәлән, группа старостасы итеп сайланган. Шулай да, дус­лары белән ял итәргә дә ва­кыт табалар.

Мәскәүдә укучы Айтурган да актив ялны хуплый. Ул буш вакытын музейларда, картина галереяләрендә һәм тарихи урыннарда уздырырга ярата.

Тулай торакта яшәп карамыйча, үзеңне чын студент дип саный алмыйсың, диләр. Безнең студентлар бу сынауны лаеклы үтәләр.

– Тулай тораклар яңа, матур, икешәр кешелек бүл­мә­ләрдә бөтен уңай­лыклар да тудырылган. Бөтен җирдә чис­талык, җылы һәм тыныч. Аерым фатирда яшәгән сыман, – дип сөйлиләр. Кыс­касы, тырышып уку, ныклы белем алу өчен шартлар әйбәт.

Студентларыбыз килә­чәк­­кә нинди планнар төзи соң?

Абдел-Малик белән Алсу Ка­занны яратып өлгергән­нәр. Киләчәкләрен дә аның белән бәйләргә ниятлиләр. Заринә әлегә белми. «Нефть һәм газ чыгару сәнәгате бөтен илебез буенча таралган, Ходай нәрсә язгандыр», – ди. Айтурган да: «Күз күрер, алда әле берничә ел укыйсы бар. Мәскәү – киң мөмкинлекләр шәһәре, кем белә бит», – дип уйчан елмая.

Шулай, алда нәрсә буласын кем дә белми. Ә менә «Сту­дентлар көне» инде буса­гадан атлап керә. Шул уңай­дан бөтен студентларны бәй­рәмнәре белән котлыйбыз! Имтихан-зачетларыгызны яхшы билгеләргә тапшырып, каникулларыгызны «койрыксыз», тыныч күңел белән һәм кызыклы итеп үт­кәрүегезне телибез!

Эльмира Сәйфуллина

ОСТАВЬТЕ ОТВЕТ

Please enter your comment!
Please enter your name here