Күңелдә иҗат ялкыны сүрелмәсен

0
42

Камышлы районының Татар Байтуганы авылында яшәүче Нурания Минсәхи кызы Абзалова, “Социаль­ная газета” басмасы уку­чылары арасында узган бәй­гедә кат­на­шып, “Әтиләр һәм бабай­лар” номинациясендә җи­ңү яу­лаган.

Бәйгегә җибәргән хатында Нурания ханым гаилә тәрбиясе турында болай язган. “Без өч кыз үстек. Гаиләдә әтигә кара­та хөрмәт зур иде. Ул өстәл артына утыр­мыйча, без утырмыйбыз, авызына аш капмыйча, ашарга тотынмыйбыз. Әтиебез, Бөек Ватан сугышында катнашкан кеше, үзенә дә, башкаларга да таләпчен иде. Без әле дә аның: “Әйттең икән – эшлә, вәгъдә бирдеңме – үтә, килеп чыкмый икән – кисәт”, дигән девизы белән яшибез. Тормышта авырлыкларны җиңәргә, максатчан һәм тырыш булырга өйрәткәне өчен мин аңа бик рәхмәтлемен. Иремнең гаиләсендә дә ата тәрбиясе сизелә. Фәрхәт – минем ышанычлы терәгем, кайгырту­чым, яклаучым. Ди­мәк, Тәл­гать әткәй улын чын ир итеп тәрбияли алган”.

Нурания Минсәхи кызы “Бердәмлек” газетасы укучыларын да кызыклы һәм эчтәлекле мәкаләләре белән куандырып тора. Туган авылында якташы, “Әлифба” авторы Сәләй Вагыйзовның музей-йортын будыруы, бүген анда экскурсияләр алып баруы белән дә даны ерак­ларга таралган. Без Нурания ханымны чын күңелдән чираттагы җиңүе белән котлап, ныклы сәламәтлек, җан тынычлыгы телибез. Нурания ханым, күңелегездә иҗат ялкыны, рухи балкыш сүрелмәсен, каләмегез – үткен, сүзләрегез күңелләрне кузгатырлык булсын.

“Бердәмлек” редакциясе хезмәткәрләре.

ОСТАВЬТЕ ОТВЕТ

Please enter your comment!
Please enter your name here