ТНВ татарлар саны кимү сәбәпләрен ачыклый
Соңгы, 2021 елгы, җанисәп нәтиҗәләре буенча татарлар, ил буенча икенче урынны саклап калсалар да, 597 000 кешегә кимегәннәр. 2020 елгы җанисәп нәтиҗәләре буенча, илдә хәзер 4 713 669 татар яши, дип исәпләнә.
Самара өлкәсендә дә хәлләр мөшкел. Губернада, яңа мәгълүматлар буенча, 94 мең кеше генә үзен татар дип яздырган. Элек өлкәдә 130 меңләп татар яши иде. Кызганычка, татарлар саны башка өлкәләрдә дә шулай ук кимегән. Моның сәбәпләрен аңлау өчен үткән чәршәмбедә ТНВ телевидениесенең “7 дней” тапшыруы журналисты Зөфәр Дәүләтшин һәм оператор Роман Безменов Самарага килеп төштеләр.
Җирле татар тормышы белән кызыксынган кешегә биредә күрсәтер нәрсәләр күп. Әлбәттә, корреспондентларны башта “Яктылык” татар мәктәбенә алып килделәр, Самараның Җәмигъ мәчетендә дә мөфти белән җитди сөйләшү булды, аннан алар Халыклар дуслыгы йортына да сугылдылар. Биредә Казан телевидениесе өлкә татар җәмгыятьләре лидерлары Әнвәр Горланов, Минәхмәт Хәлиуллов, Ильяс Шәкүров, Халыклар дуслыгы йорты директоры Игорь Буров, “Бердәмлек” өлкә татар газетасының баш мөхәррире Данияр Сәйфиев белән очраштылар.
Татарлар саны кимү буенча татар лидерлары төрле версияләр тәкъдим иттеләр:
«Җанисәп нәтиҗәләре Самара өлкәсендә дә татарлар саны кискен кимүен күрсәтә, ләкин бу саннар икеләнү тудыра. Бездә күп кешегә җанисәп алучылар килмәгән, ә Дәүләт хезмәтләре порталы аша анкета тутыручылар аз булган, чөнки олы яшьтәге кешеләр компьютердан ул кадәр үк оста куллана алмыйлар. Хәтта глобализация һәм ассимиляция, катнаш никахлар, Татарстанга һәм Төркиягә күчеп китүчеләрне, коронавирустан вафат булучыларны исәпләгәндә дә, татарлар саны кимү ул хәтле күп булырга тиеш түгел, киләчәк җанисәпләрдә татарлар арасында агитацияне куәтлерәк алып барырга кирәк, дигән нәтиҗәгә килделәр, Зубчаниновкадагы “Болгар мирасы” мәчете имамы Расих Вакказов кебек, чагыштыру өчен, үз исәп-хисабыбызны да алырга кирәк, дип белдерделәр.
ТНВның “7 дней” тапшыруын карап барыгыз, анда бу теманы җентекләбрәк күрсәтерләр.
Эльмира Шәвәлиева