Сәйдә Мөхәммәтҗанова: «Хыялым тормышка ашты»

0
233

Үзәк каналдан бөтен дөньяга татар җырын яңгыраткан «Голос. Дети» җыры проекты җиңүчесе Сәйдә Мөхәммәтҗановага бүген 20 яшь тулды. Халыкчан тавышлы милли җырчыбызның тавышы тагын да байый, үз-үзенә ышанычы да ныгыганнан-ныгый. Сәйдә – татарның өмете. Шуңа аның иҗатына тәнкыйть тә, хуплау сүзләре дә күп ишетелә. Яраткан җырчыбыз туган көнен нинди хисләр белән каршылый? Тамашачысын нинди җырлары белән сөендерергә җыена? Тәнкыйть сүзләренә үпкәсе юкмы? Без әнә шуларны белештек.

– Сәйдә, соңгы вакытта күп иҗат итәсең, ләкин клипларыңа карата уңай фикер генә түгел, тискәресен дә язалар. Тәнкыйтьне ничек кичерәсең?
– Тәнкыйть булмаса, җырчы үзен формада тота алмас иде. Мин төрле фикер кирәк дип саныйм. Ул бит үсешкә этәргеч бирә. Тәнкыйть булсын, битарафлык кына булмасын. Фикерләр барысы да яхшы гына була алмый инде.

– Бу җыр сиңа килешми, иҗатыңны ваклыйсың, дигән сүзләргә ничек карыйсың?
– «Саба җилләре» җырына төшерелгән клипта катнашканнан соң, чыннан да, төрле фикерләр ишетергә туры килде. Ул вакытта Илнар Шәрәфетдинов мине икенче тавышка җырларга чакырган иде. Чыннан да, төрлесен яздылар. Ике ир-ат арасында ничек төштең, диючеләр дә булды. Миңа калса, бу клипның фикере бар һәм мин аны мәгънәсез җыр дип әйтмәс идем. Шуңа күрә әлеге проектта катнашуда үзем өчен зур трагедия күрмим. Аңлаучылар начар сүз язмады, мәгънәсенә төшенә алмаучылар ниндидер кимчелек эзләде. Без бөтен фикергә дә җавап язарга, аңлатырга тырышабыз. Безнең җаваплардан соң тынычланалар үзе.

– Клипларыңа Татарстан Президенты Рөстәм Миңнеханов та игътибар итә. Күптән түгел бер җырың белән Инстаграм сәхифәсендә дә бүлеште.
– Бу – Луиза Батыр-Болгариның «Мин сине шундый сагындым» җырына төшерелгән, яңа сулыш өрелгән җыры иде. Без Илнар Шәрәфетдинов белән аны татар һәм инглиз телләрендә башкардык. Беләсезме, әлеге эшкә бәйгедә катнашырга дип тотынган идек. Лос-Анджелес шәһәрендә узарга тиеш иде ул. Ләкин санитар-эпидемиологик вазгыятькә бәйле рәвештә ул онлайн форматта узды. Тагын бер клип әзерлибез. Анысы Муса Җәлил сүзләренә иҗат ителгән «Җырларым» дигән җыр.

– Илнар Шәрәфетдинов белән иҗади тандем дәвам итәчәкме?
– Мин дәвам итәр дип өметләнәм. Чөнки безнең тавышларыбыз туры килә. Бу – бик сирәк күренеш. Күз күрер, алга китеп берни дә әйтеп булмый. Сүз уңаеннан, Илнар Шәрәфетдиновны да Луиза Батыр-Болгари күреп алган бит. Безгә бергә эшләргә ул тәкъдим итте.

– Сәйдә, туган көнеңдә иң зур хыялың нинди, дип сорамыйча калып булмас инде.
– Бүген минем хыялымны чынга ашырдылар дип тә әйтеп була. Япониядә яшәүче ике туган абыем «Аэрофлот» компаниясенең сертификатын бүләк итте. Бу – бик зур бүләк. Абыем минем Париждагы Эйфель манарасына менеп, «La via an rose» көенә кайнар шоколад эчәргә хыяллануымны белә иде. Абыема бу бүләге өчен бик зур рәхмәт. Рәхмәтемнең иң зурысы – әти-әниемә. Алар миңа гомер бүләк итүчеләр. Гомер – иң зур бүләк ул. Исән-сау, бәхетле булсыннар иде. Минем аларның горурлыгы буласым, сөендерәсем генә килә.

Блиц-сораулар:
– Яраткан җырчың.
– Казахстан җырчысы Димаш Кудайберген. Татар эстрадасыннан аерып әйтмим, алар күп.
– Яраткан китабың.
– Гадел Кутуйның «Тапшырылмаган хатлар»ы һәм Гаяз Исхакыйның «Ике йөз елдан соң инкыйраз…»ы.
– Яраткан ризыгың.
– Әнием пешергән гөбәдия.
– Кешеләрдә син яраткан сыйфат.
– Иманлы, мәрхәмәтле һәм намуслы булу.
 Сәйдә ул – татар кызы.

 Гөлинә Гыймадова

vatantat.ru

ОСТАВЬТЕ ОТВЕТ

Please enter your comment!
Please enter your name here