Нинди генә һөнәрне дә дәреслекләрдән өйрәнеп була, диләр. Ә менә авыл хуҗалыгын уңышлы алып бару өчен укымышлы булу гына аз. Аның нечкәлекләренә кечкенәдән үк, җаен күреп, әти-әниең, әби-бабаң белән бергә эшләп үскәндә генә төшенергә була.

Авыл хуҗалыгы каты сынаулар аша узган чорда уңышлы гына эшләп киткән фермерлар мактауга һәм хөрмәткә лаек. Камышлы районының Балыклы авылы фермеры Альмир Рафаэль улы НИГЪМӘТУЛЛИН шундыйларның берсе. Аны ата-бабалары нигез салып калдырган эшнең дәвамчысы, дип атарга була.

Альмирның ерак бабасы Солтанай, тархан булып, мор­заларга тиң саналган һәм авыл хуҗалыгында эшләп көн күргән. Аның балалары, онык һәм оныкчыклары Хисмәт, Нигъ­мәтулла, Гайзулла, Хә­биб һәм Рафаэль дә авыл тормышына зур өлеш керткән тырыш кешеләр. Революциягә кадәр туган Нигъмәтулла ти­мерче булып эшләгән, улы Гайзулла Хисмәтов, колхозлар оешкач та, колхозга керә һәм гомер буе шунда эшләп, “Атказанган колхозчы” исеменә лаек була. 1933 елда туган Хәбиб  Нигъмәтуллинны авыл хуҗалыгы производствосы но­ваторы дип атыйлар иде. Ул югары белемле колхоз рәисе буларак, фәнни технологияләр кулланып, колхозны алдын­гылар санына чыгара, “Мактау билгесе” ордены белән бүләк­ләнә.

Рафаэль Хәбиб улы белеме буенча инженер-механик. Хез­мәт юлын тракторчы булып эшләүдән башлый. Югары белем алгач, колхозның баш инженеры, «Агропромснаб» оешмасы җитәкчесе, потреб­союз директоры булып китә, «Правда» колхозы рәисе итеп сайлана, ә колхоз җирләре «Раздольное» авыл хуҗалыгы оешмасына тапшырылгач, ди­ректор урынбасары вазифа­ларын үти.

Хәзер инде менә Альмир Рафаэль улы Нигъмәтуллин аларга алмашка килде. Ул, Самара дәүләт техник уни­верситетын тәмамлавына ка­рамастан, җиргә тартыла. Малай мәктәптә укыганда ук казлар үрчетә башлый. Вакыт узу белән авыл хуҗалыгында эшләү теләге көчәя, һәм ул фермер хуҗалыгы булдыруга китерә. Хәзерге вакытта ул үзе укыган университетта абруйлы вазифа башкара, кандидатлык эше әзерли һәм киләчәктә Аль­мирны җитди перспектива көтә, диләр. Шуңа да карамастан, ул авыл хуҗалыгы белән кы­зыксынуын ташламый, кире­сенчә, әлеге теләге ныгый гына. Быел Альмир авыл хуҗалыгы конкурсында җиңеп, дәүләт грантына ия булды. Ул терлек үрчетү юнәлешен сайлаган, үзенең 80 гектар җирендә терлек азыгы җитештерә. Ял көннәрендә Самарадан туган авылы Балыклыга ашыга,  ба­суларны үзе сөрә, ашлык үстерә, печән әзерли. Грант бу­енча бирелгән акчага кирәкле техника сатып алган, «Абер­дин-ангусская» дип аталган итле токым бозаулары кайтарган…

Альмир Нигъмәтуллин ке­бек кешеләр катлаулы күчеш чорында да әйдәп бару­чылардан. Аларга бик авыр. Сайлаган юлын ташлап, бо­рылып китүчеләр дә байтак. Безнең илдә азык-төлек про­граммасын хәл итү, авыл хуҗалыгы продукциясе җи­теш­терү һәм эшкәртү кече эшмәкәрлек системасы үсе­шен­нән башка була алмый. Кызганычка, бу мөһим те­ма әлегә популяр түгел. Хәт­та авыл халкы да терлек һәм кош-корт асрау белән шөгыльләнергә теләми. Ә менә Альмир Нигъмәтуллин кебек энтузиастлар һәм җиргә тугры кешеләр булу – авыл киләчәгенә өмет уята.

Егетнең авылдагы  эшчән­ле­ге фермер хуҗалыгы белән ге­нә чикләнми. Альмир Балык­лы­да спорт үстерү өчен дә күп көч куя. Аның җитәкчелегендә авыл волейболчылары коман­дасы район ярышларында гына түгел, зона ярышларында да призлы урыннар яуладылар. Күп турнирларны – үз акчасына, кайсы вакытта энтузиастлар яисә иганәчеләр акчасына оештыра. Егет бигрәк тә гер спортын ярата, үзе дә төрле ярышларда катнаша һәм хәтта өлкә ярышларында да призлы урыннар яулап килә.

Альмир, бай фантазияле, уйлап табучан кеше буларак, киләчәккә кыю планнар төзи һәм аларны тормышка ашыруга омтыла. Мәсәлән, әле бала чагында ук Балыклы авылы аша аккан елганы буып, балык үрчетү белән шөгыльләнү ту­рында хыяллана. Ул хәтта яшьтәшләрен дә бу эшкә җә­леп итә. Тора-бара лидерлык сыйфатлары тагын да яхшырак күренә башлый. Хәзер инде ул Самара дәүләт техник университетының  җитештерү һәм инжиниринг үзәгендә ди­ректор урынбасары булып эшли. Анда металл эшкәртү ысулларын фәнни яктан тик­шерәләр, гадәти булмаган бурычларның чишелешен эз­ләп табу белән шөгыльләнә­ләр. Моның белән бергә ул   политехник университеты кар­шындагы “Перспектива” үзәге директоры да бит әле.

Альмир Нигъмәтуллин – аралашучан, ачык һәм яңа идеяләр белән мавыгып китү­чән кеше. Үзен производство­ның төрле юнәлешләрендә, спорт­та һәм җәмәгать эш­ләрендә сынап карый һәм һәрвакыт җиңүгә ирешә. Аның энер­гетикасы ташып тора һәм ул башкаларны да артыннан ияр­тә белә. Якташыбызга бөтен башлангычларында да уңышлар телим.

Фәрид Шириязданов.

Бердэмлек