1 июнь – Халыкара балаларны яклау көне
“Нәрсә ул бәхет?” дигән сорауга һәркем үзенчә җавап бирә. Берәүләр аны акчадан күрсә, икенчеләре рухи байлык туплый. Ә Самарада яшәүче Илшат һәм Лилия МӘКЪСУТОВЛАР биш балалары – биш алма кебек кызлары белән бәхетле.
Илшатка кияүгә чыккач, үзе ишле гаиләдә үскән Лилия – ике сабый, ә әти-әнисенең бердәнбер уллары булган ире күп бала турында хыялланалар. Нәкъ Илшатның теләкләре фәрештәләрнең “Амин” дигәненә туры килгәндер дә инде.
– Өч игезәк бала булачагын белгәч, башта югалып калдым. Бу вакытта өлкән кызыбыз Алиягә – 5, ә Алсуга өч кенә яшь иде. Дөресен генә әйткәндә, тагын бәби алып кайтырбыз, дип уйламаган да идек, – дип сөйли Лилия.
…Равия, Камилә һәм Кадрия үз вакытларында туалар һәм өйгә алып кайткач, гаилә өчен “кызу” көннәр башлана. Аеруча Лилиягә авыр була. Кайвакытта бер баланы карап бетереп булмый, ә монда өчәү! Илшатка рәхмәт, “Мин – акча табучы (Илшат “Сбербанк” оешмасының административ-техник бүлеге хезмәткәре), ә йорт эшләре, балалар үстерү – синең өстә”, – дип тормый. Эштән ничек кенә арып кайтса да, Лилиягә балалар карауда, өй эшләрендә ярдәм итә. Кызлары да әтиләрен көтеп алалар, аның белән урамга чыгарга яраталар. Чөнки ул үзе дә балалар кебек – уйный, шаяра, әле берсен, әле икенчесен атландырып йөртә. Әлбәттә, ике яклап әби-бабалары да гаиләгә кулларыннан килгәнчә ярдәм итәләр.
Гаилә алга зур планнар белән яши. Өченче бала туган өчен бирелергә тиеш җир кишәрлеге алып, зур йорт корырга, шунда яшәргә хыялланалар. “Кызганычка, әлегә шәһәрдән ерак урыннарда җир бирәләр, бу безне канәгатьләндерми.
Ә күп балалы гаиләләргә тиешле субсидияләрдән һәм ташламалардан еш файдаланабыз. Мәсәлән, өлкә хөкүмәте өченче бала туган өчен – 100 мең сум региональ гаилә капиталы, өч игезәк өчен 350 мең сум пособие бирде. Шул сабыйларга 3 яшь тулганчы өчесенә дә унар мең сум акча алып тордык. Өлкән балалар мәктәптә бушлай ашыйлар, торак-коммуналь түләүләргә – 50, балалар бакчасына 70 процент ташлама бирелә. Әлбәттә, ишле гаиләнең чыгымнары да зур. Шулай да, дәүләт тарафыннан күрсәтелгән ярдәм гаилә бюджеты акчаларын бераз янга калдырырга мөмкинлек бирә”, – дип сөйли Лилия ханым.
Мәкъсутовлар балаларның аң-белем үсешенә зур әһәмият биреп, алар белән өйдә дә шөгыльләнәләр, өстәмә белем бирү үзәкләренә дә йөртәләр. Мәсәлән, Алия белән Алсу 21 санлы сәнгать мәктәбенә рәсем ясау дәресләренә йөриләр. Мәктәптәге кызлары бары тик “бишле” тамгаларына укыйлар. Ә игезәкләр бию көе ишетүгә тыпырдый башлыйлар икән. Бераз үсә төшкәч, әти-әниләре аларны бию түгәрәгенә йөртергә җыеналар.
Ә иң мөһиме – гаиләдә балаларга милли тәрбия бирелә. Өйдә татарча сөйләшергә тырышалар, бергәләп татарча мультфильмнар карыйлар, җырлар өйрәнәләр. Моңа әби-бабалары да сөенеп туя алмый.
Менә шулай, тормышка зарланмыйча, Ходайның биргәненә шөкер итеп, гаилә бәхетенә төренеп яшиләр Мәкъсутовлар.
“Халыкара балаларны яклау көненә карата укучыларыбызга нинди теләктә каласыз?” дигән сорауга Илшат белән Лилия: “Газиз балаларыбыз бәйрәм көннәрендә генә түгел, ә һәрвакыт әти-әни кайгыртуын, сөюен һәм игътибарын тоеп яшәсен. Һәр бала бәхетле булсын!” – дип җавап бирделәр. Амин, шулай булсын!
Алия Арсланова.
Бердэмлек